> “No eis a fai a inconis s’unidadi intre pastoris e partidas iva”, in Casteddu ària maba asuta de su Consillu regionali | ilMinuto

“No eis a fai a inconis s’unidadi intre pastoris e partidas iva”, in Casteddu ària maba asuta de su Consillu regionali

(IlMinuto) – Casteddu, 26 de su mesi de argiolas – Sa batalla de is pastoris sardus s’acapiat a cussa de is artesanus e de is butegajus contra a Equitalia. Mentris est crèscendi s’arrabiu asuta de is pórcius de bia Roma, cun ghetadas de lagrimogenus e cropus de tuturus no at a bastai su nou nau de sa presidenti de su Consillu regionali, Claudia Lombardo, ananti a sa dimanda po atobiai cun unus cantu personis de is duus movimentus (ddu narat Videolina) po arrogai s’arrólliu de is movimentus in lota. In su momentu chi scrieus (14.32) unus cantu personis de su Mps e de su Movimentu artesanus e butegajus líberus portant a càstiu is diversas intradas de su Palatzu abetendi una cunfirma de s’atóbiu.

Sa lota de is pastoris s’acapiat a cussa de is partidas iva: oi funt pagu prus de 3milla is pastoris benius de dónnia logu de s’ísula (‘Urùne, Teulada, Sant’Anna Arresi, Casteddu, Tùla e àterus logus) po tzerriai su patimentu insoru a faci de su Consillu regionali e po pediri “a su Guvernu regionali sa solutzioni a is arragus malus de sa pastoria e de s’acolumia sarda”. Acanta ddoi funt is pastoris sitzilianus de su “Movimento dei Forconi” (“Seus innoi po manifestai cun is pastoris sardus – at nau a IlMinuto Marino Ferro – poita teneus is mantessis arragus e una classi política chi no ddus su scit cumbati) e is partidas Iva chi funt contra a Equitalia, cun genti chi est benia de su Campidanu e de su Súrcis Igresienti. In custas oras in s’Hotel Mediterràneu de Casteddu s’est tenta un’assebrea – aprontada de sa Cia – po chistionai de massaria e pastoria in Sardìnnia.

© RIPRODUZIONE RISERVATA

0 Arrespustas a ““No eis a fai a inconis s’unidadi intre pastoris e partidas iva”, in Casteddu ària maba asuta de su Consillu regionali”


Is cummentus funt serraus.