> “Galsi s’arruga de sa morti”. Zuncheddu narat de nono a su metanodotu « ilMinuto – notizie Mediterranee – edizione Sardegna

“Galsi s’arruga de sa morti”. Zuncheddu narat de nono a su metanodotu

(IlMinuto) – Casteddu, 22 de su mesi de austu – “Òpera criminali”. Aici Claudia Zuncheddu, consilleri regionali indipendentista, definit su metanodotu Galsi: unu tubu de unu diàmetru de unu metru e 20 chilómitrus – acostau de un’àrea serbítziu de 80 metrus a dereta e a manca de s’istrutura – chi at a passai totu s’Ísula po 272 chilómitrus de Sud-Ovest a Nord-Est. “Su cumprimentu de su progetu – denuntziat Zuncheddu in d-unu comunicau de imprenta – previdit su sciàsciu de totu cussu chi s’òpera at agatai in su caminu suu: cultura, arti, natura, ecunumias traditzionalis e àteru. S’arriscu costanti de scópius at a fai destrossas mabas, e at influiri in sa vida giai umiliada de sa genti sarda. Po un”òpera criminali’ chi fait totu custu sciàsciu. lamada de chini at fatu su progetu ‘tzerachia de passada’, no est prevìdia nisciuna arrecumpénsia econòmica e nisciunu serbítziu po sa Sardìnnia e sa genti sua”. “Finiu su traballu – si ligit in d-una proposta presentada de Zuncheddu e àterus – si is sardus ant a bolli gosai de su metanu, nd’ant a depi fai dimanda paghendiddu a prétziu de su mercau”. S’acórdiu internatzionali po su cumprimentu de su Galsi est stetiu firmau su 14 de su mesi de totussantus de su 2007 in S’Alighera. S’òpera – si ligit in su documentu presentau in Consillu regionali – “si candidat a diventai su gasdotu prus longu e prus fundudu de su mundu” e at a tucai de s’Algeria po arribai in Toscana atressu de sa Sardìnnia.

© RIPRODUZIONE RISERVATA

0 Arrespustas a ““Galsi s’arruga de sa morti”. Zuncheddu narat de nono a su metanodotu”


Is cummentus funt serraus.