> “Ndi liant sa demogratzia, no ndi liant is privilégius de sa casta”. Su no de Cumpostu e Zuncheddu a s’irminorigamentu de is consilleris regionalis « ilMinuto – notizie Mediterranee – edizione Sardegna

“Ndi liant sa demogratzia, no ndi liant is privilégius de sa casta”. Su no de Cumpostu e Zuncheddu a s’irminorigamentu de is consilleris regionalis

Cumpostu Zuncheddu(IlMinuto) – Casteddu, 8 de su mesi de Cabudanni – “Cun s’irminorigamentu de is consilleris regionalis is indipendentistas ant essi stresiaus po sèmpiri de su Consillu regionali”. Aici Bustianu Cumpostu, cordinadori natzionali de Sardigna Natzione, comentat s’aprou de parti de sa Comissioni autonomia de sa proposta chi previdit s’irminorigamentu de is eligius de 80 a 50, ma nisciunu irminorigamentu a su dinai pigau de is consilleris regionalis: 11.417 eurus a su mesi (datus Sole24ore). “Un’irminorigamentu a sa demogratzia e no a is privilégius de sa casta”, po Cumpostu, chi proponit invecis de amenguai su dinai de is consilleris regionalis e de is assessoris, no si depit arribai a  pigai prus de 5milla eurus a su mesi.“Custa proposta – comentat su cordinadori de Sni – iat a fai 50 califus de bandera italiana chi de sa primu diri de cadira iant a traballai scéti a sa sighidura de su califau e iant a portai su votu de is sardus in arregalu a is féudus italianus de cussus ‘e totu. In s’assembrea de bia Roma funt duus is consilleris regionalis chi a su mamentu ant nau ca nou a sa proposta: Claudia Zuncheddu (Indipendentistas) e Radhouan Ben Amara (Pdci-Fds). “In d-unu mamentu de crisi económica e sotziali grai – comentat su rapresentanti indipendentista in Consillu – sa classi política sarda, po poderai is próprius privilégius, trebeddat cun boluntadi […] is ‘irminorigamentus netzessàrius a is costus de sa política’ cun is ‘irminorigamentu a sa demogratzia’”. Calencunu mesi fait Zuncheddu iat presentau una proposta de lei po s’irminorigamentu de su 50 po centu de su dinai pigau de is consilleris e àterus provedimentus chi iant a portai a s’arrisparmiu de pagu prus de 7 milionis de eurus a s’annu.

© RIPRODUZIONE RISERVATA

0 Arrespustas a ““Ndi liant sa demogratzia, no ndi liant is privilégius de sa casta”. Su no de Cumpostu e Zuncheddu a s’irminorigamentu de is consilleris regionalis”


Is cummentus funt serraus.