> 2011 mes’e cabudanni 05 | ilMinuto

Archíviu de sa diri 5/09/2011

Acòntessia Keller: 320 postus de traballu a arriscu. Sighit s’ocupatzioni, aMpI: “Su Stadu italianu custringit a serrai un’àtera industria sarda”

(IlMinuto) – Casteddu, 5 de su mesi cabudanni – Sa raiadura de un’ordinatzioni de 15 milionis de eurus. Sa dimanda de pagamentu de una penali de àterus 10 milionis. Custus determinus de Trenitalia asuba de su tempus benidori de sa Keller de Biddacidru arriscant de fai serrai in pagu tempus s’azienda chi fabricat carrossas de trenu fadendi perdi 320 postus de traballu. Contra a is determinus de s’enti de is ferruvias, is operàjus de s’azienda, ant pigau sa ditzisioni de ocupai s’istabilimentu, innoi de su 2 de su mesi de cabudanni ddoi est un’assembrea fissa. Cenàbara is operàjus ant tentu sa bisita de s’assessori provintziali a su Traballu Simona Lobina. Ariseru ddoi funt stétius is fueddus de su presidenti de sa Regioni Ugo Cappellacci e de s’assessori a s’Industria Alessandra Zedda (su cuartu assessori regionali a s’Industria in duus annus e mesu e pagu prus). Asuba de sa chistioni at chistionau atressu de unu comunicau puru a Manca pro s’Indipendentzia. Sighi a ligi ‘Acòntessia Keller: 320 postus de traballu a arriscu. Sighit s’ocupatzioni, aMpI: “Su Stadu italianu custringit a serrai un’àtera industria sarda”’

Iscola: cras in Abas assembrea de su Comitau Precàrius Aristanis

(IlMinuto) – Casteddu, 5 de su mesi cabudanni – S’amparu de s’iscola “beni de totus” de candu est cumentzada sa “sciusciadura”. At a essi custu su tema de sa fibera de assembreas aprontadas de su Cordinamentu Precàrius Iscola de Aristanis. Su primu atopu est po cras a merì in Abas, in sa domu de s’Unioni de is Comunus, a is 18.00. Sighi a ligi ‘Iscola: cras in Abas assembrea de su Comitau Precàrius Aristanis’

Lei eletorali: su Pdci bullat a su referendum contra a su “Porcellum”. Sighit s’arregorta de is firmas

(IlMinuto) – Casteddu, 5 de su mesi cabudanni – Sighit s’arregorta de is firmas in acotzu de su referendum contra a sa lei eletorali “Porcellum” po torrai a cussa “Mattarellum” (75 po centu de is parlamentaris elìgius cun su magioritariu, 25 po centu cun su proportzionali). A custa campannia referendaria funt participendi rapresentantis de su Pd, de Fli, de su Pli e de s’Idv, ma no ddoi est su Pdci, chi no at a acotzai a s’arregorta de is firmas. Po su cordinadori regionali de su Pdci Alessandro Corona sa lei eletorali proposta de su referendum no iat a permiti a is tzitadinus de sceberai is próprius rapresentantis in Parlamentu. Sighi a ligi ‘Lei eletorali: su Pdci bullat a su referendum contra a su “Porcellum”. Sighit s’arregorta de is firmas’

Isciòpiru: sindacaus de basi in pratza in Casteddu contra a “is 120 miliadrdus de eurus liaus”

(IlMinuto) – Casteddu, 5 de su mesi cabudanni – Puru is sindacaus de basi cabant in pratza e ant a isciopirai po otu oras su 6 de su mesi cabudanni contra a sa manuvra de su Guvernu. “Sa manuvra economica prus grai fata fintzas a imoi – si ligit in d-una nota fata connosci de s’Usb Sardìnnia – chi ndi liat arrisorsas a is tzitadinus, a is traballadoris, a is giòvanus po ddas donai a is bancas e a is missionis militaris”. Po nai ca no a is “120 miliardus de eurus liaus” in Sardìnnia, is sindacaus de basi, ant aprontau una manifestada in Casteddu. S’atopu est po cras a is 9.00 in pratza Santu Cosomo. Sighi a ligi ‘Isciòpiru: sindacaus de basi in pratza in Casteddu contra a “is 120 miliadrdus de eurus liaus”’

Is “Arrugas” de Marina Cafè Noir

(IlMinuto) – Casteddu, 5 de su mesi de cabudanni – De su 15 a su 18 de su mesi cabudanni torrat in su bixinau de sa Marina de Casteddu su Festival de Literaduras “Applicate” aprontau de s’Assótziu Culturali Chourmo. Lòmpiu a sa nona editzioni sua, ocannu su Marina Cafè Noir at a chistionai de “Arrugas”. Sighi a ligi ‘Is “Arrugas” de Marina Cafè Noir’