> Acòntessia Keller: 320 postus de traballu a arriscu. Sighit s’ocupatzioni, aMpI: “Su Stadu italianu custringit a serrai un’àtera industria sarda” | ilMinuto

Acòntessia Keller: 320 postus de traballu a arriscu. Sighit s’ocupatzioni, aMpI: “Su Stadu italianu custringit a serrai un’àtera industria sarda”

(IlMinuto) – Casteddu, 5 de su mesi cabudanni – Sa raiadura de un’ordinatzioni de 15 milionis de eurus. Sa dimanda de pagamentu de una penali de àterus 10 milionis. Custus determinus de Trenitalia asuba de su tempus benidori de sa Keller de Biddacidru arriscant de fai serrai in pagu tempus s’azienda chi fabricat carrossas de trenu fadendi perdi 320 postus de traballu. Contra a is determinus de s’enti de is ferruvias, is operàjus de s’azienda, ant pigau sa ditzisioni de ocupai s’istabilimentu, innoi de su 2 de su mesi de cabudanni ddoi est un’assembrea fissa. Cenàbara is operàjus ant tentu sa bisita de s’assessori provintziali a su Traballu Simona Lobina. Ariseru ddoi funt stétius is fueddus de su presidenti de sa Regioni Ugo Cappellacci e de s’assessori a s’Industria Alessandra Zedda (su cuartu assessori regionali a s’Industria in duus annus e mesu e pagu prus). Asuba de sa chistioni at chistionau atressu de unu comunicau puru a Manca pro s’Indipendentzia.“Un’àtera borta – scririt aMpI – su stadu italianu, in custa acòntessia cun d-un’enti suu, custringit a su fallimentu un’atividadi produtiva sarda de importu mannu e ddu fait in d-una manera de su totu arbitrària. Est Craru ca apartèniri a su stadu italianu po is traballadoris sardus bolit nai andai in faci a sa raiadura de dónnia possibilidadi de traballu […]“.

© RIPRODUZIONE RISERVATA

0 Arrespustas a “Acòntessia Keller: 320 postus de traballu a arriscu. Sighit s’ocupatzioni, aMpI: “Su Stadu italianu custringit a serrai un’àtera industria sarda””


Is cummentus funt serraus.