> Isciòpiru generali: manifestadas Cgil in otu tzitadis sardas. Is sindacaus de basi in pratza in Casteddu | ilMinuto

Isciòpiru generali: manifestadas Cgil in otu tzitadis sardas. Is sindacaus de basi in pratza in Casteddu

(IlMinuto) – Casteddu, 6 de su mesi cabudanni – Casteddu, Tàtari, Nùgoro, Aristanis, Terranòa, Crabònia, Seddori e Tortolì. Trisinant totu is provìntzias is manifestadas chi sa Cgil at aprontau in Sardìnnia po s’isciòpiru generali: otu oras de auséntzia de su traballu po nai ca no a sa manuvra “contra a sa crisi” chi in custas diris est a s’esamu de su Parlamentu. In Casteddu, funt stétias pagu prus de 3milla is personis  a ai pigau parti a su corteu tucau de pratza Garibaldi po acabai cun sa prallata in pratza de su Cramu. Sa Cgil – si ligit in d-una nota sindacali – est cabada in pratza contra a una “manuvra ingiusta poita tocat a pagai sa crisi a chini pagat is pagamentas in manera onesta, a is traballadoris e a is pensionaus e chi ferrit po su prus a sa Sardìnnia”. S’Ísula – at precisau su segretàriu regionali Enzo Costa – at essi corpia prus de is àterus de sa Finantziaria. Ant avisau s’isciòpiru generali puru is sindacaus de basi, ca – sèmpriri in Casteddu – ant aprontau una manifestada in pratza Santu Cosomo. “Custa – scririt Usb in d-una nota – est sa manuvra prus grai fintzas a oi. Aferrat is dipendentis púbblicus e scancellat is diritus a cumentzai de su cuntratu natzionali de traballu”. S’isciòpiru at donau calencunu strobu a is cullegamentus ferruviarius e aereus: a su mamentu funt otu is volus scancellaus a s’aereoportu de Casteddu-Su Masu e cincu in cussu de S’Alighera-Fertilia.

© RIPRODUZIONE RISERVATA

0 Arrespustas a “Isciòpiru generali: manifestadas Cgil in otu tzitadis sardas. Is sindacaus de basi in pratza in Casteddu”


Is cummentus funt serraus.