> Sotziedadi: sa fémina gràida de duus gemellus at a finiri s’ingraidéntzia a foras de su presoni | ilMinuto

Sotziedadi: sa fémina gràida de duus gemellus at a finiri s’ingraidéntzia a foras de su presoni

(IlMinuto) – Casteddu, 16 de su mesi de cabudanni – Est acabada beni s’acuntéssia de V.D., sa presonera de 28 annus – mama de cuàturu pipius de 8, 6, 5 e 3 annus e gràida de duus gemellus – chi una dexina de diris fait fut stétia arricoverada in s’ispidali Santu Giuanni de Deus, in Casteddu, po mori de un’amaletzu de istrumadura meda grai. Su magistrau de Latina – agoa de ai nai ca no a is arrestus domitziliaris pagu prus de duas cidas fait – at apustis de tantu detzìdiu de permiti a sa fémina de finiri s’ingraidéntzia a foras de su presoni, donendi a V.D. s’óbligu de abitatzioni in Roma. Ddu fait sciri cun d-una nota de imprenta Maria Grazia Caligaris, presidenti de s’Assótziu “Socialismo Diritti e Riforme”. “Sa fémina – comentat Caligaris – at a abetai duncas sa nàscida de is duus gemellus a foras de su presoni acanta a is pipius suus e a su pobiddu. Comenti at essi dimitia de s’ispidali at essi acumpangiada in s’aereoportu e at a lompi in Roma, aundi dda abetat sa família”.

© RIPRODUZIONE RISERVATA

0 Arrespustas a “Sotziedadi: sa fémina gràida de duus gemellus at a finiri s’ingraidéntzia a foras de su presoni”


Is cummentus funt serraus.