> Tiscali: 130 traballadoris “in prus”. In bendida Sa Illeta. Sindacaus: “No paghint scéti is traballadoris” | ilMinuto

Tiscali: 130 traballadoris “in prus”. In bendida Sa Illeta. Sindacaus: “No paghint scéti is traballadoris”

(IlMinuto) – Casteddu, 16 de su mesi de cabudanni – Eventualis arràntzias o tardamentus in sa programatzioni de su tempus benidori de Tiscali no podint essi “scarrigadas scéti asuba de s traballadoris”. Est cantu narat is segreterias natzionalis de Slc-Ccgil, Fistel-Cisl e Uilcom-Uil, in d-una nota fata connosci ariseru a sa fini de un’atopu cun s’amministradori delegau de s’azienda, Renato Soru. Tiscali tenit dépidus po pagu prus de 200 milionis de eurus, chi s’azienda bolit sanai cun s’isvilupu de serbítzius, bendendi sa domu de Sa Illeta intru s’annu – po 20 milionis de eurus e pagu prus – e liendi postus de traballu po 7 milionis. Iant essi 130 is traballadoris “in prus” po immoi – de ponni in càscia integratzioni istraordinària – po unu totali de 965 traballadoris. “S’azienda – narant is tres sindacaus – at evidentziau ca po immoi s’irminorigamentu de su costu de su traballu est scéti temporàneu”. “Oi – pretzisat sa nota sindacali – Slc-Cgil, Fistel-Cisl e Uilcom-Uil, impari a is Rsu, ant a detzídiri cun is traballadoris atopaus in assembrea comenti ghiai sa contienda”.

© RIPRODUZIONE RISERVATA

0 Arrespustas a “Tiscali: 130 traballadoris “in prus”. In bendida Sa Illeta. Sindacaus: “No paghint scéti is traballadoris””


Is cummentus funt serraus.