> “Tocat a frimai a s’ocupatzioni militari italiana”. Su movimentu indipendentista narat ca no a sa caserma de Pradu « ilMinuto – notizie Mediterranee – edizione Sardegna

“Tocat a frimai a s’ocupatzioni militari italiana”. Su movimentu indipendentista narat ca no a sa caserma de Pradu

(IlMinuto) – Casteddu, 20 de su mesi de ledàminis – Totu su movimentu indipendentista sardu est prontu a sighiri a s’opòniri a su fàbricu de sa caserma de Pradu, in Nùgoro, e a pediri unu sceberu po s’isvilupu de su territóriu. Est cantu est stétiu nau ariseru a mangianu in d-una cuferéntzia de imprenta in sa domu natzionali nugoresa de a Manca pro s’Indipendentzia in bia Aurelio Saffi,  ant pigau parti a sa cosa, su dirigenti de aMpI, Giorgio Devias, e su consilleri provintziali de ProgRes Bobore Bussa. Su de sa caserma – at pretzisau Bussa – est un’esémpiu clàssicu de comenti “su statu italianu s’arretirat de sa Sardìnnia, serrendi is serbítzius útilis a sa populatzioni, e amanniendi ivecis sa preséntzia sua cun s’ocupatzioni militari e àteras suciarras comenti Equitalia”. Devias at invecis fatu unu pagheddu de contus. “Is 24 milionis de eurus assinniaus po sa caserma – at pretzisau su rapresentanti de aMpI – iant a depi doni unu salàriu mínimu de 1200 eurus a 37 personis po 35 annus […] cun d-una faina chi iat a depi fai cresci a s’ecunumia e sa su traballu. Custa caserma de 24 milionis de eurus at essi invecis fabricada impitendi 12,3 milionis de dinai públicu liau a s’edilitzia universitària”.

© RIPRODUZIONE RISERVATA

0 Arrespustas a ““Tocat a frimai a s’ocupatzioni militari italiana”. Su movimentu indipendentista narat ca no a sa caserma de Pradu”


Is cummentus funt serraus.