> 14 « mes’e ledàminis « 2011 « ilMinuto – notizie Mediterranee – edizione Sardegna

Archíviu de sa diri 14/10/2011

Petróliu. Interrogatzioni apretosa de ProgRes asuba su Progetu Lianora

(IlMinuto) – Casteddu, 14 de su mesi de ledàminis – Su Progetu Lianora at a intrai luegus in su Consillu provìntziali de Aristanis. Su rapresentanti de ProgRes in s’assembrea, Sebastian Madau, at a presentai cantu primu un’interrogatzioni apretosa asuba de s’intentzioni de sa Saras de cumentzai sa circa de su petróliu in Arborea cun d-unu putzu “esplorativo”. “Sa Saras – si ligit in d-unu comunicau de ProgRes asuba de su Rrogetu Lianora – est intentzionada a trivellai in d-un’area de 4.430 étarus aintru de sa Provìntzia de Aristanis, cun su fàbricu de unu putzu in d-unu bellu tretu de su Comunu de Arborea, no atesu meda de su Situ de Interessu Comunitàriu […] de S’Ena Arrubia, area ambientali amparada innui nidificat sa gentarrúbia. A  ingíriu de unu chilómitru biedus su campegiu comunali, sa marina de Arborea, e tanti domus colonicas e, acanta de su putzu, is terras de sa messarítzia e de s’allevamentu”. Sighi a ligi ‘Petróliu. Interrogatzioni apretosa de ProgRes asuba su Progetu Lianora’

Lei eletorali: s’assembrea aprovat a s’irminorigamentu de is consilleris. Ma ddoi est chini narat ca no

(IlMinuto) – Casteddu, 14 de su mesi de ledàminis – Cun 64 favoràbilis, cuàturu astensionis e scéti unu no su Consillu regionali at aprovau sa proposta de lei natzionali po amenguai de 80 a 60 su númeru de is consilleris chi iant a depi pigai parti a s’assembrea legislativa sarda. Su documentu aprovau ariseru, chi previdit sa mudífica de s’artículu 16 de su statutu, imoi at essi passau a su Parlamentu. “Cun s’aprou de sa proposta – comentat sa presidenti de su Consillu regionali Claudia Lombardo – s’Assembrea […] donat proa de bolli sighiri a donai su própriu contributu a s’irminorigamentu de s’ispesa pública”. S’únicu no est stétiu su de Claudia Zuncheddu (Indipendentistas), chi de sèmpiri est contra a sa méngua de is consilleris e in faori invecis de ndi liai “is costus e is privilégius de sa classi política sarda”. Sighi a ligi ‘Lei eletorali: s’assembrea aprovat a s’irminorigamentu de is consilleris. Ma ddoi est chini narat ca no’

“Po su Tzensimentu de su 2011 sa língua sarda no esistit”. Sa protesta de Su Comitadu

(IlMinuto) – Casteddu, 14 de su mesi de ledàminis – Su Tzensimentu de su 2011 de sa populatzioni raiat sa língua sarda, su catalanu de S’alighera e is àteras línguas “alloglotte” de s’Ísula. Ddu denuntziat cun d-una nota de protesta Su Comitadu pro sa Limba sarda. “In àteras Regionis a Autonomia ispeciali – pretzisat su Comitadu – innui ddoi funt minorias linguìsticas comenti sa slovena, sa sud tirolesa, sa valdostana e sa ladina […] custas funt stétias pigadas in cundisériu in s’aprontamentu is módulus in sa língua insoru o in su tzensimentu de is minorias linguìsticas internas”. Sighi a ligi ‘“Po su Tzensimentu de su 2011 sa língua sarda no esistit”. Sa protesta de Su Comitadu’

Sindrome de Cuirra: cras atopu po “fiimai sa destrossa”. “Gettiamo le basi”: “In pratza su 15 de dónnia mesi”

(IlMinuto) – Casteddu, 14 de su mesi de ledàminis – Su permissu de sa Cominssioni parlamentari de averiguatzioni asuba de s’uràniu impoberessiu a su spricullitu “epidemiologico” de sa Regioni in is tretus militaris de sa Sardìnnia no firmat sa denúntzia de su comitau “Gettiamo le Basi” e de s’assótziu “Famiglie di militari uccisi”. Cras a mangianu a is 10.00, comenti dónnia 15 de su mesi a cumentzai de su mesi argiolas passau, ddoi at essi un’atopu in pratza de su Cramu, in Casteddu, po pediri un’àtera borta “beridadi e giustítzia po chini est mortu po mori de is belenus de gherra e po mori de su Poligonu e po dimandai de firmai a sa destrossa de stadu”. Sighi a ligi ‘Sindrome de Cuirra: cras atopu po “fiimai sa destrossa”. “Gettiamo le basi”: “In pratza su 15 de dónnia mesi”’

Mostras: in Casteddu “Atóngiu in tzitadi”

(IlMinuto) – Casteddu, 14 de su mesi de ledàminis – Est stétia oberta sàbudu passau e s’at a podi biri fintzas a su 23 de su mesi ledàminis in su “Spazio 61″ – in bia de is Genovesus 48, in Casteddu – sa segunda editzioni de s’avenimentu de arti “Atóngiu in tzitadi”. S’iscopu est donai importu a òperas chi tenit comenti únicu acàpiu: sa libertadi de espressioni atressu de sceberus artísticus autónomus. Sighi a ligi ‘Mostras: in Casteddu “Atóngiu in tzitadi”’