> Ambienti. Su Csf a s’aministratzioni Zedda: “Un’arràntzia a ndi liai is tres jacarandas” | ilMinuto

Ambienti. Su Csf a s’aministratzioni Zedda: “Un’arràntzia a ndi liai is tres jacarandas”

(IlMinuto) – Casteddu, 10 de su mesi ledàminis – Su Csf bullat a su sceberu de s’aministratzioni Zedda de ndi liai a is tres jacarandas,  ”po arrexonis de seguresa”, in is traballus de fàbricu de s’arrodiadora in pratza Santu Beneitu. “Su Csf – si ligit in d-una lítera operta scrita de Serafino Canepa e mandada a s’assessori a sa “Viabilità”, Mauro Coni e a s’assessori a s’Urbanistica e a su Birdi, Paolo Frau – cuntziderat in manera dessintotu negativa sa “cementificazione” sa mirífica pratza Santu Beneitu po fai logu a un’arrodiadora smesurada, intre s’àteru, no at tzertu amenguai a su tràvigu de is màchinas in d-unu tretu impestau meda”. Canepa denuntziat a “sa sderrexinadura de tres jacarandas ispantosas chi agiudànt, cun is àteras, a fai bella bia Danti e a frenai” s’impestadura de s’ària in su tretu.E is arrexonis de seguresa? “In nòmini de arrexonis de seguresa – pretzisat su rapresentanti de su Csf – s’est amanniau in su tretu su logu postu a dispositzioni po is màchinas, mentris arrexonis de seguresa prus cuncretas iant a depi pediri un’amparu de is personis, a cumentzai de is prus débilis comenti is pedonis, cun s’irminorigamentu sériu de su tràvigu privau, e de is logus dedicau a issu, in faori de is médius públicus”.

© RIPRODUZIONE RISERVATA

0 Arrespustas a “Ambienti. Su Csf a s’aministratzioni Zedda: “Un’arràntzia a ndi liai is tres jacarandas””


Is cummentus funt serraus.