> Su movimentu Contra a Equitalia in pratza cun sa bandela de s’artículu 51, aMpI: “Indipendentistas acotzint sa proposta de Zuncheddu” « ilMinuto – notizie Mediterranee – edizione Sardegna

Su movimentu Contra a Equitalia in pratza cun sa bandela de s’artículu 51, aMpI: “Indipendentistas acotzint sa proposta de Zuncheddu”

(IlMinuto) – Casteddu, 24 de su mesi de ledàminis – Su pópulu Contra a Equitalia cabat in pratza in “sa diri de sa scidadura”. Su 10 de su mesi de totussantus chi benit, cun proposta de su Movimentu “Artigiani e Commercianti Liberi”, in Casteddu ddoi at a essi una manifestada manna. S’atopu est po is 8.00 a faci de sa Regioni in s’arburada Trento. “Unius – acrarant is aprontadoris – si podit totu”. Su movimentu Contra a Equitalia pedit de torrai a oberri sa contienda intradas, s’aprontadura de is “zonas liberas de is pagamentas” e s’arreconnoscimentu de su “stadu de crisi”. Is aprontadoris faint una bandela de s’artículu 51 de su Statutu ispeciali de sa Sardìnnia. Claudia Zuncheddu, difatis, in is diris passadas iat pediu cun d-una interrogatzioni a Ugo Cappellacci, s’ apricu de custu artículu. Sa norma previdit chi sa Giunta regionali pedat a su stadu italianu sa suspensioni de is provedimentus dannosus po s’ecunumia de s’Ísula. Sa proposta “Contra a Equitalia” benit arregorta de a Manca pro s’Indipendentzia, chi pedit a totus is indipedentistas de aprobiai asuba de custu puntu. “S’acotzu políticu de totus is scuadras indipendentistas a sa proposta de sa Zuncheddu  – si ligit in d-una nota de imprenta – at  essi sa demostratzioni de sa capatzidadi de aprobiai asuba de propostas “anticolonialiste” cuncretas e [...] at a afortiai sèmpiri de prus is batallas po s’indipendentzia e sa soverania de sa natzioni nostra”.

*Ant a pigai parti a sa manifestada: “Movimento Sardi Liberi”, ProgRes, Irs, Malu Entu, “Artigiani e commercianti”, No Radar, “Antiequitalia”, “Comitato Sardo  Equitasse”, Sardigna Natzione, “Movimento Pastori Sardi”, “Unione degli Studenti e Coordinamento Precari”, A manca pro s’indipendentzia.

© RIPRODUZIONE RISERVATA

0 Arrespustas a “Su movimentu Contra a Equitalia in pratza cun sa bandela de s’artículu 51, aMpI: “Indipendentistas acotzint sa proposta de Zuncheddu””


Is cummentus funt serraus.