> Impestadura. Zuncheddu (Indipendentistas): “In s’area industriali de Pòrtu Turre crescint is tumoris” | ilMinuto

Impestadura. Zuncheddu (Indipendentistas): “In s’area industriali de Pòrtu Turre crescint is tumoris”

(IlMinuto) – Casteddu, 5 de ledàminis – Fai connosci a sa genti sa destrossa ambientali filla de s’impestadura industriali fata de su Petrolchímicu. Cun custu obietivu lúnis passau unu grupu de militantis de Irs at ocupau po unus cantu oras su Comunu de Pòrtu Turre. S’atzioni de lota arricit s’acotzu de is Indipendentistas, chi in custa batalla s’arringherant “a su costau de Irs”. “S’agataus – pretzisat Zuncheddu – a faci de una destrossa ambientali cun arretumbus grais asuba de sa messarítzia, de s’allevamentu, asuba de totus is fainas traditzionalis e asuba de sa saludi de sa genti chi bivit ingunis”. Unu datu scéti asuba de s’impestadura de su logu: s’amassulu de “benzene” in is mitzas de sa Nurra bincint de 417milla bortas a sa norma.S’Irricistru Tumoris de Tàtari e Isde (“Medici per l’Ambiente”) – pretzisat Zuncheddu – denuntziant s’aumentu mannu de tumoris in su tretu industriali de Pòrtu Turre. “In totu sa provìntzia de Tàtari – si ligit in su comunicau chi denuntziat is dannus de s’impestadura de su Petrolchímicu – a s’annu is tumoris chi corpint is pipius e is piciocheddus superantt su 3,8 po centu (contra a s’1% de àterus logus europeus e su 0’7% de is Istadus Unius)”.

© RIPRODUZIONE RISERVATA

0 Arrespustas a “Impestadura. Zuncheddu (Indipendentistas): “In s’area industriali de Pòrtu Turre crescint is tumoris””


Is cummentus funt serraus.