> Lei eletorali: s’assembrea aprovat a s’irminorigamentu de is consilleris. Ma ddoi est chini narat ca no « ilMinuto – notizie Mediterranee – edizione Sardegna

Lei eletorali: s’assembrea aprovat a s’irminorigamentu de is consilleris. Ma ddoi est chini narat ca no

(IlMinuto) – Casteddu, 14 de su mesi de ledàminis – Cun 64 favoràbilis, cuàturu astensionis e scéti unu no su Consillu regionali at aprovau sa proposta de lei natzionali po amenguai de 80 a 60 su númeru de is consilleris chi iant a depi pigai parti a s’assembrea legislativa sarda. Su documentu aprovau ariseru, chi previdit sa mudífica de s’artículu 16 de su statutu, imoi at essi passau a su Parlamentu. “Cun s’aprou de sa proposta – comentat sa presidenti de su Consillu regionali Claudia Lombardo – s’Assembrea […] donat proa de bolli sighiri a donai su própriu contributu a s’irminorigamentu de s’ispesa pública”. S’únicu no est stétiu su de Claudia Zuncheddu (Indipendentistas), chi de sèmpiri est contra a sa méngua de is consilleris e in faori invecis de ndi liai “is costus e is privilégius de sa classi política sarda”.Contra a s’irminorigamentu de is consilleris puru Sardigna Natzione, chi in is diris passadas at aprontau unu sit in de Vardania democràtica asuta de is pórcius de bia Roma. Imoi – at pretzisau sa scuadra indipendentista – “is consilleris regionalis ant essi scéti is chi ant a nai is partidus italianus e is tzeracus insoru”. Narat ca no a sa proposta de lei puru Sinistra critica sarda. Po s’organizatzioni anticapitalista s’impiticamentu de su númeru de is consilleris afortiat a is meris in Consillu regionali e a is privilégius insoru.

© RIPRODUZIONE RISERVATA

0 Arrespustas a “Lei eletorali: s’assembrea aprovat a s’irminorigamentu de is consilleris. Ma ddoi est chini narat ca no”


Is cummentus funt serraus.