> “Isciòpiru de su fàmini de is presoneris palestinesus in is presonis israelianus”, cras atóbiu-dibàtidu in Casteddu | ilMinuto

“Isciòpiru de su fàmini de is presoneris palestinesus in is presonis israelianus”, cras atóbiu-dibàtidu in Casteddu

(IlMinuto) – Casteddu, 2 de su mesi de totussantus – Fueddai de is arraxonis de s’isciòpiru de su fàmini de is presoneris palestinesus in is presonis israelianus. Est custu s’obietivu de s’atóbiu-dibàtidu in programa po cras a merì in Casteddu – 17.30, àula magna de Isciéntzias políticas – aundi ant a chistionai Fawzi Ismail (Assótziu Sardìnnia Palestina), Irene Melis (Amnesty International) e Wasim Dahmash, profesori de língua e literadura araba. “De su 1967 – si ligit in d-una nota – funt 750milla is palestinesus passaus atressu de is presonis israelinus. A oi funt 11milla is presoneris políticus in Israeli (de custus 37 funt féminas e 257 minoris chi tenit prus pagu de 18 annus) e scéti 6 milla in presoni agoa de ai tentu unu protzessu”. Is presoneris palestinesus in is presonis isralianus iant fatu s’isciòpiru de su fàmini giai in su 1992 e in su 2004. Imoi sa protesta est ghiada de Ahmed Saadat, boxi de su Fronti Populari po su Liberamentu de sa Palestina. Saadat est fadendu s’isciòpiru de su fàmini de 22 diris.

© RIPRODUZIONE RISERVATA

0 Arrespustas a ““Isciòpiru de su fàmini de is presoneris palestinesus in is presonis israelianus”, cras atóbiu-dibàtidu in Casteddu”


Is cummentus funt serraus.