> “Bruno est líberu”. Sinistra Critica Sarda: “Assolutzioni corpu mannu a su marcatismu a s’italiana” Mulas dedicat ligimentu públicu a Bellomonte. Sa felicidadi su Minadori arrúbiu | ilMinuto

“Bruno est líberu”. Sinistra Critica Sarda: “Assolutzioni corpu mannu a su marcatismu a s’italiana” Mulas dedicat ligimentu públicu a Bellomonte. Sa felicidadi su Minadori arrúbiu

(IlMinuto) – Casteddu, 22 de su mesi de totussantus – Sinistra Critica Sarda s’allirgat po s’assolutzioni e sa liberatzioni – agoa de 29 mesis de impresonamentu preventivu – de Bruno Bellomonte. Po su cordinamentu sardu de s’organizatzioni anticapitalista e anticolonialista sa senténtzia de ariseru est “unu corpu mannu a sa cassa a is istregas contra a su comunismu e contra a s’indipendentismu, marcatismu beru a s’italiana, chi at biu un’àtera borta a su dirigenti de aMpI comenti vitima”. Cassa a is istregas chi po Sinistra Critica sighit cun s’obertura de s’operatzioni Arcadia e cun s’atrassadura a giudítziu de 18 militantis indipendentistas de manca. “Custu atu – si ligit in d-una lítera oberta de solidariedadi a is indagaus – est un’ulteriori mostrantza ca s’atzioni de scontroriadura chi ddoi est in Sardìnnia est movia de arrexonis políticas, est a nai de sa boluntadi de scontroriamentu de dónnia forma de arresesténtzia a s’arregimi coloniali de isfrutamentu, de poberesa e de ocupatzioni militari”. Puru sa boxi de su Comutau traballadoris Pro Bruno Bellomonte, Antonello Tiddia, si ndi prexat po s’assolutzioni de su dirigenti de aMpI, agoa de ai aprontau in is úrtimus annus tanti protestas de solidariedadi. “De su primu mamentu – pretzisat un’àtera borta su Minadori arrúbiu – eus nau ca s’inchiesta fadiat  àcua de dónnia parti. No ddoi furiat nisciuna proa, nudda de nudda”. Sa liberatzioni de su dirigenti indipendentista at essi afestada puru cun is versus de Giovanna Mulas. Sa cantadora at a dedicai su ligimentu públicu contra a sa violéntzia asuba de is féminas in programa po su 25 de su mesi de totussantus in su palatzu Régiu de Casteddu, a is 18.00, “a Bruno Bellomonte, a sa família e a totus is cumpantzus chi [...] funt stétius presentis in s’acuntéssia”. “Su ludu aundi ant dépiu nadai – pretzisat Mulas – in custus mesis ddus at fatu prus fortis e, si possíbili, prus unius”.

Naraus gràtzias a Paola Rizzu po s’ai donau sa fotografia

© RIPRODUZIONE RISERVATA

0 Arrespustas a ““Bruno est líberu”. Sinistra Critica Sarda: “Assolutzioni corpu mannu a su marcatismu a s’italiana” Mulas dedicat ligimentu públicu a Bellomonte. Sa felicidadi su Minadori arrúbiu”


Is cummentus funt serraus.