> Acuntéssia Bellomonte. Giua (Cobas Iscola): “Isciòpiru de su fàmini de solidariedadi fintzas a sa senténtzia” | ilMinuto

Acuntéssia Bellomonte. Giua (Cobas Iscola): “Isciòpiru de su fàmini de solidariedadi fintzas a sa senténtzia”

(IlMinuto) – Casteddu, 16 de su mesi de totussantus – Is Cobas de s’iscola funt a su costau de Bruno Bellomonte. A pagus oras de sa dimanda de su pm de 10 annus e 7 mesis po su dirigenti de a Manca pro s’Indipendentzia cun s’acusa de ai pigau parti a sa presunta nàscida a nou de is Br, s’assembrea natzionali de su sindacau de basi, atopada su 12 e su 13 de su mesi de totussantus in Bologna, at difatis votau a cuncórdiu una motzioni po espressai solidariedadi a Bellomonte e sa cumpantza Caterina Tani. No est acabada innoi, Nicola Giua istóricu arrapresentanti de is Cobas Sardìnnia de oi cumentzat s’isciòpiru de su fàmini po mantenni bia s’atentzioni de sa genti asuba de s’acuntéssia. “De oi – scririt Giua – ap’a cumentzai comenti arrapresentanti de is Cobas un’isciòpiru de su fàmini de solidariedadi contra a sa presonia foras de contu e contra a su protzessu chi est patendi Bruno Bellomonte, impari a àterus imputaus, acusaus de ‘banda armada cun iscopus terroristicus’”. S’isciòpiru at a sighiri fintzas a sa senténtzia, prevìdia po cida chi benit. “Connosciu – pretzisat su rapresentanti de is Cobas – a Bruno de prus de vint’annus […]. Bellomonte no est scéti un’ativista sindacali de basi est puru unu militanti indipendentista chi at sèmpiri fatu totu is fainas políticas chi ddu bint impinniau de 40 e prus a sa luxi de su sobi”. “Cumbidaus a totus, po su prus a is Cobas – pretzisat Giua – a cundividi s’isciòpiru de su fàmini, puru cun s’adesioni individuali po diris scapuas, po fai intendi a Bruno e a is àterus totu sa solidariedadi. I mbiai is adesionis a s’isciòpiru de su fàmini a s’email: nicogiua@tiscali.it e s’email de is Cobas de sa Sardìnnia: cobasardegna@gmail.com“.

© RIPRODUZIONE RISERVATA

0 Arrespustas a “Acuntéssia Bellomonte. Giua (Cobas Iscola): “Isciòpiru de su fàmini de solidariedadi fintzas a sa senténtzia””


Is cummentus funt serraus.