> Esercitatzionis de Itàlia e Israeli asuba de is celus sardus, aMpI: “Duus stadus stràngius impitant s’Ísula comenti poligonu | ilMinuto

Esercitatzionis de Itàlia e Israeli asuba de is celus sardus, aMpI: “Duus stadus stràngius impitant s’Ísula comenti poligonu

(IlMinuto) – Casteddu, 8 de su mesi de totussantus – Po duas cidas de su mesi de ledàminis Israeli e s’Itàlia ant sceberau is celus de sa Sardìnnia po fai una fibera de esercitatzionis militaris, cun s’impitu de F-15 e F16 tucaus de is basis de Nevatim e Tel Nof e sa sperimentatzioni de un’aéreu radar militari nou. A cantu narat s’agentzia Infopal is aéreus israelianus at potziu bobai asuba de totu s’Ísula, chi tenit una subrafaci cantiapari cussa de su stadu de israeli. Asuba de s’acontéssia fueddat cun d-una nota de imprenta su Diretivu natzionali de a Manca pro s’Indipendentzia. “Sa manca indipendentista sarda – scririt aMpI – denuntziat su modu scurrégiu asuba de saterra nostra impitau de su stadu italianu chi donat tretus mannus de su territóriu natzionali po iscopus [...] imperialisticus”. “Duus stadus stràngius, Itàlia e Israeli – pretzisat su diretivu de a Manca – impreant sa terra nostra comenti poligonu de tiru po sperimentai armas noas e po aprontai atacus militaris a àterus stadus o po gestiri a su mellus su degollu de unu pópulu intreu comenti su palestinesu”. “S’aviatzioni italiana – pretzisat s’agentzia Infopal – at impitau aéreus medas, intre custus ddoi furiat puru s’Eurofighter Typhoon, e sa cosa at arrapresentau meda po Israeli, biu ca ndi tenit puru s’Arabia Saudita”.

© RIPRODUZIONE RISERVATA

0 Arrespustas a “Esercitatzionis de Itàlia e Israeli asuba de is celus sardus, aMpI: “Duus stadus stràngius impitant s’Ísula comenti poligonu”


Is cummentus funt serraus.