> Manifestada: in Casteddu 200 narant ca no a su metanodotu coloniali. Sàbudu cuncertu No Galsi in Terranòa | ilMinuto

Manifestada: in Casteddu 200 narant ca no a su metanodotu coloniali. Sàbudu cuncertu No Galsi in Terranòa

(IlMinuto) – Casteddu, 12 de su mesi de paschixèdda – Sa protesta contra a su Galsi no si frimat. Sàbudu a mangianu funt stétias pagu prus de 200 is personis chi ant pigau parti a sa manifestada de Casteddu contra a su fàbricu de su Metanodotu Algeria Itàlia Sardìnnia. A su corteu, obertu de su striscioni “No a su colonialismu, No a su Galsi”, furiant presentis su Comitau ProSardegnaNoGasdotto, A Manca pro s’Indipendentzia – chi at aprontau sa manifestada -, “Sinistra Critica sarda”, “Partito Comunista dei Lavoratori”, “Collettivo anticapitalista sardo”, Assótziu Zirichiltaggia; “Comunisti – Sinistra popolare” de Casteddu e de su Surcis, Disarmiamoli Sardigna, Casteddu Social Forum, “Solarussa in Movimento”, “Liberta’ Sarda”, Comitau “Carlofortini Preoccupati”, Grupu “Tutti i sardi contro il Galsi”, Az.namusn.art (colletivu artísticu), Meetup 31 (Amigus de Beppe Grillo in Sardìnnia) e Claudia Zuncheddu. Sa mobilitada contra a custa òpera chi is manifestantis definint inútili, cara e dannosa po s’ecunumia e po s’ambienti at a sighiri sàbudu chi benit in sa Sardìnnia de Tramuntana. Su 17 de su mesi paschixèdda in Terranòa est difatis in programa unu corteu dibàtidu (17.00, pratza Mercau) aprontau de su Movimentu de opinioni “Tutti i sardi contro il Galsi” ant a sonai Dr Drer Crc Posse, Dr Boost, Gesuino Deiana & Gianni Mannu, Tzocu e Bellisario. “S’iscopu de sa manifestada nostra – si ligit in d-una nota – est su de fai cumprendi a sa genti is mudamentus chi su metanodotu at a fai a su territóriu e po su prus chi a fai a s’ambienti, a su turismu a sa sotziedadi, boleus donai is scedas chi funt cuadas a sa populatzioni. Sa protesta at a trisinai totus is 40 comunus chi si bint su Galsi in domu. Cristiano Sabino (boxi de aMpI) at difatis annutziau una campannia de scedas bidda po bidda.

© RIPRODUZIONE RISERVATA

0 Arrespustas a “Manifestada: in Casteddu 200 narant ca no a su metanodotu coloniali. Sàbudu cuncertu No Galsi in Terranòa”


Is cummentus funt serraus.