> Riformatoris: “po Molentargius tocat a fai cresci su sport e sa pisca”. aMpI “is òperas mannas turisticas e sportivas no funt s’arrespusta giusta” « ilMinuto – notizie Mediterranee – edizione Sardegna

Riformatoris: “po Molentargius tocat a fai cresci su sport e sa pisca”. aMpI “is òperas mannas turisticas e sportivas no funt s’arrespusta giusta”

(IlMinuto) – Casteddu, 22 de su mesi de fiàrgiu – Comenti si podit avalorai su Parcu Naturali Molentargius Salinas? A sa pregunta ant arrespustu, cida passada, is Riformatoris Sardus, fadendi una fibera de propostas chi iant a depi torrai a donai cabali, cualifichendidda, a sa chi benit cunsiderada una zona úmida de balimentu internatzionali intre is prus importantis de Europa. Is innovatzioni propostas de is Riformatoris previdint su fàbricu de òperas mannas turisticas, atividadis sportivas, culturalis e produtivas. “Si rendeus contu – narat Anna Maria Busia, cordinadora tzitadina de sa fortza política de Casteddu- de cantu su parcu siat una risossa de importu mannu po sa tzitadi”. Po custu po is Riformatoris “su tzircúitu de aintru de su parcu iat a essi adatu a acasagiai garas ‘podistiche’” e ”is diversas coras de àcua iant a podi essi impitadas po sa pisca sportiva”.

Dda pentzat diversamenti a Manca pro s’Indipendentzia chi cun d-unu comunicau de imprenta pretzisat ca “is òperas mannas po su turismu e is òperas sportivas no funt s’arrespusta giusta po un’amparu bonu de una risossa naturalistica de cussu importu po sa tzitadi de Casteddu e po sa Sardigna totu”. Sa manca indipendentista, sighit su Diretivu Natzionali de a Manca, “s’arringherat cun sa genti de su bixinau de Medau su Cramu, mai intendius e ignoraus de is istitutzionis, comenti sèmpiri acontessit a is tzitadinus de Natzioni Sarda”.

© RIPRODUZIONE RISERVATA

0 Arrespustas a “Riformatoris: “po Molentargius tocat a fai cresci su sport e sa pisca”. aMpI “is òperas mannas turisticas e sportivas no funt s’arrespusta giusta””


Is cummentus funt serraus.