> 14 « mes’e marzu « 2012 « ilMinuto – notizie Mediterranee – edizione Sardegna

Archíviu de sa diri 14/03/2012

“Seus stétius aici pagu impari”: a s’imprenta 30 líteras segretas intre Julca Schucht e Gramsci

Ascurta custa nova

‎(S’úrtima nova) – Casteddu, 14 de su mesi de martzu – “Ninu Stimau… seus stétius aici pagu impari… Amàbili Antoni, oi Deliu at fatu dexi annus, si nd’est scidau e at ghetau asuba de su fradixeddu ciuculateddus… T’abratzu forti forti”. Inghitzant aici unus cantu de líteras segretas, pagu prus de 30, chi Julca Schucht, pobidda russa de nàscidas tedescas de Antoni Gramsci, iat imbiau a s’intelletuali sardu candu s’agatàt presoneri in is presonis fascistas. A fueddai de s’esistentzia de is líteras est stétiu Antoni Gramsci junior, musicista e nebodi de su babbu de su partidu Comunista, fillu de su segundugénitu Ilianu, chi at detzidiu de cundividi custus arregodus de importu mannu donendi a s’imprenta is epístulas. “S’arregota – narat Gramsci junior – at a tenni comenti títulu ‘Seus stétius aici pagu impari’. Una frasi chi s’agat fatuvatu in sa corrispondéntzia cun Julca, chi rapresentat beni s’àxiu de su separonzu fortzau”. “Su raportu epistolari intre ajàju miu e ajàja mia furiat costanti” – sighit su musicista de Mosca – “Ddoi est stétiu un’interrumpimentu crutzu de calencunu mesi intre su 1929 e su 1930; issu s’intendiat traixu de su partidu, issa teniat unu problema de saludi. Calencuna punta de billetu de ajàja est un’òpera de naturalesa e poesia”. Sighi a ligi ‘“Seus stétius aici pagu impari”: a s’imprenta 30 líteras segretas intre Julca Schucht e Gramsci’

“Furriaus su dépidu”. Cenàbara in Aristanis assembrea cun Franco Turigliatto

(IlMinuto) – Casteddu, 14 de su mesi de martzu – “Sa crisi de su neoliberismu e su crobu asuba de sa demogratzia”. At essi custu su tema de s’assembrea pública aprontada de su Comitau “Furria su dépidu”, in programa po cenàbara 16 de su mesi de martzu i Aristanis (17.30, Hotel Isa). Obietivu de su comitau est de arregolli adesionis po s’apellu de fai una comissioni de inchiesta apitzus de su dépidu públicu. “Dépidu públicu – si ligit in d-una nota – assumau po favorèssiri arrendas, profetus, interessus de classi e de unu girixeddu de meris, seguramenti no est fatu po agiudai is ispesas sotzialis, s’imparu, sa cultura, su traballu”. Sighi a ligi ‘“Furriaus su dépidu”. Cenàbara in Aristanis assembrea cun Franco Turigliatto’

Referendum. Tocco (Campidanu de Mesu): “De s’abolitzioni de is Provìntzias at a lompi su caos”

(IlMinuto) – Casteddu, 14 de su mesi de martzu – “S’abolitzioni de is Provìntzias at fai unu casinu mannu. Ma custa cosa no benit afrontada poita in medas ant abratzau sa tesi de sa raiadura de custus entis trampendi a is tzitadinus, chentza nimancu ai avreguau is datus”. Est cantu narat in d-unu comunicau de imprenta Fulvio Tocco, presidenti de sa Provìntzia de su Campidanu de Mesu. “Chini at propostu sa raiadura de is Provìntzias – pretzisat Tocco – est stetiu lébiu meda, malesa e incompeténtzia no pigant in cunsidériu chi s’iat essi ingenerau unu trambullu aici mannu chi podit portai a un’àtera crisi de sa pública aministratzioni”. Su Presidenti fueddat puru de un’istúdiu fatu de pagu de sa Bocconi de Milanu. Sighi a ligi ‘Referendum. Tocco (Campidanu de Mesu): “De s’abolitzioni de is Provìntzias at a lompi su caos”’

“Cosa de macus”: su film nou de Enrico Pitzianti de su 16 a 22 de su mesi de martzu in su tzínema

(IlMinuto) – Casteddu, 14 de su mesi de martzu – Tenit comenti títulu “Cosa de macus. Un’istória bera: sa circa de una domu po si ndi torrai a pigai sa vida” s’úrtimu film de Enrico Pitzianti in programma de su 16 a su 22 de su mesi de martzu in is aposentus de su Cineworld de Casteddu, in is de su The Space tzínema de Cuartucciu e a su Greenwich d’Essai, su círculu de su tzínema casteddaiu de bia Tàtari. Una produtzioni chi at biu a su regista traballai cun d-unu cast ispeciali: is residentis e is operadoris de Casamatta, domu sotziali e de assistu de Cuartu Sant’Aleni aundi bivint otu personis cun istrobus a conca. Su film contat própriu s’istória de custa istrutura, chi cun 17 annus  de vida scéti benit giai cunsiderada meda ainnantis in su panorama mondiali, “unu logu aundi – si ligit in d-una nota – is personis cun sufaréntzias mentalis podint isperai de si torrai a fai una vida”. Sighi a ligi ‘“Cosa de macus”: su film nou de Enrico Pitzianti de su 16 a 22 de su mesi de martzu in su tzínema’

Comitadu pro sa limba sarda: “Su Consillu de is Ministrus no at ratificau su Paperi europeu. Ant fatu connosci unu comunicau fadiu

(IlMinuto) – Casteddu, 14 de su mesi de martzu – Sighit sa lota in faori de sa língua sarda mandada a innantis de su Comitadu pro sa limba sarda. Custa borta sa protesta pertocat unu comunicau apitzus de sa presunta ratífica de su “Paperi europeu de is línguas regionalis o de minoria” de parti de su Consillu de is Ministrus, fatu connosci su 9 de su mesi de martzu passau, e chi isvelau fadiu est stétiu currégiu, ma chentza de fai connosci una ratífica ufitziali. Sa nota de imprenta bessia in su giassu de su Consillu de is Ministrus at difatis incidau acoitu diversus dúbius “intre is prus atentus osservadoris de su movimentu linguísticu sardu”. “Difatis furiat stétiu fatu notai – pretzisat unu comunicau de Su Comitadu pro sa limba sarda – comenti is trataus internatzionalis segundu is artículus 80 e 87 de sa Costitutzioni fessant ratificabilis cun sa firma de su presidenti de sa Repúbrica, sa cunvalida de su presidenti de su Consillu de is Ministrus ma prévia ‘autorizatzioni de is Camera’”. Agoa de pagu diris, su comunicau originàriu est stétiu currégiu, cun sa naradura giusta: “Su Consillu de is Ministrus, a pabas de sa proposta de su Ministeru de is afàrius ésterus e de su Ministri de is afàrius regionalis, at aprovau su disignu de ratífica de su Paperi europeu de is línguas regionalis o de minoria”. Sighi a ligi ‘Comitadu pro sa limba sarda: “Su Consillu de is Ministrus no at ratificau su Paperi europeu. Ant fatu connosci unu comunicau fadiu’