> 2012 mes’e marzu 19 | ilMinuto

Archíviu de sa diri 19/03/2012

Sardigna terra de binus apretziaus?

Ascurta custa nova

(S’úrtima nova) – Casteddu, 19 de su mesi de martzu – Sa Sardigna bantat una traditzioni vitivinicola millenaria e oi puru sa viticoltura rapresentat su primu cultivu vezetali isulanu. A su mamentu si produsint binus de calidadi, contaus po is carateristicas organoleticas chi tenint. Funt binus saliosus, friscus e aromatus. Intre custus, su Vermentinu est s’única produtzioni de àxina bianca a ai tentu sa Denominatzioni de Origini Controllada Garantia. De cabori grogu pagliarinu, tenit una gradatzioni chi andat de is 10° a is 14° i est consillau po acumpangiai su pisci, prusatotu is frutus de mari, sa butàriga, is croxius, ma andat beni puru po sa petza bianca e po is antipastus. Duas is variedadis de Vermentinu produsias in s’ísula: su de Gaddura (12°-14°) e su de Sardigna (ingíriu a is 11°). Ma poita seus chistionendi de custu binu? Poita su Vermentinu, a cantu narant is datus de unu spricullitu fatu de sa SymphoyIRI Group po Vinitaly 2012, puru si est s’únicu binu sardu chi s’agatat in is classíficas de bendida de is binus in is supermercaus de sa penísula, est a su númeru 13 de sa graduatória de is bendidas italianas. Sighi a ligi ‘Sardigna terra de binus apretziaus?’

“Oi una diri de giustítzia po is traballadoris sardus!”. Bellomonte depit torrai a pigai debressi su traballu suu

‎(IlMinuto) – Casteddu, 19 de su mesi de martzu – “Chi no at fatu dannu a nisciunu e duncas est inculpàbili”. Est custa sa definitzioni chi su ditzionàriu de sa língua italiana Sabatini Coletti donat a s’agetivu “innocente”. Innotzenti est s’agetivu chi de sèmpiri eus donau a Bruno Bellomonte, declarau aici de is giugis de sa Corti de Assise de su Tribunali de Roma in su mesi de totussantus passau, a pustis de 29 mesis de presoni preventivu. Una presonia, ddu amentaus, fundada asuba de unu teorema acusatoriu chentza de fundamentu e totu políticu, acapiau a una campagna mediatica foras de contu e a unu lissentziamentu de su traballu po auséntzias ingiustificadas. “Bruno s’agatàt a is arrestus de pagu prus de un’annu candu is ferruvias de su stadu in su 2010 ant determinau de ddu lissentziai poita ‘assenteista’ de su traballu – pretzisat una nota de imprenta de a Manca pro s’Indipendenzia, organizatzioni política de Bellomonte – Bruno furiat in presoni a patiri su protzessu chi agoa ddu at biu bessiri dessintotu innotzenti”. “Su fatu no sussistit”, recitat sa senténtzia, ma mancai in su mesi de totussantus Bellomonte siat stétiu declarau innotzenti cun fórmula prena, Trenitalia determinat de no torrai a pigai unu de is sindacalista suus prus gherradoris. Sighi a ligi ‘“Oi una diri de giustítzia po is traballadoris sardus!”. Bellomonte depit torrai a pigai debressi su traballu suu’

Serbítzius públicus: in Senobrì serbítzius po su traballu e Inps in d-unu mantessi Tzentru

(IlMinuto) – Casteddu, 19 de su mesi de martzu – “Sa Provìntzia de Casteddu no at a permiti chi is tzitadinus de is territórius prus foranus, giai castigaus de s’auséntzia de traballu e de isvilupu, abarrint chentza de serbítzius públicus”. Cun custus fueddus s’assessori provintziali de su Traballu, Lorena Cordeddu, cumentat sa firma, de cenàbara passau, de su protocollu de acórdiu intre sa Provìntzia de Casteddu, s’Inps e is comunus de sa Trexenta-Gerrei po su cumprimentu, in Senobrì, de unu Tzentru arricau Serbítzius po su Traballu-Inps.

In Thiniscòle sa VI biennali de su Prémiu Natzionali de Literadura po sa Crialla Sardigna

‎(IlMinuto) – Casteddu, 19 de su mesi de martzu – Òperas imprentadas, òperas no imprentadas, òperas tzinematograficas, òperas in língua sarda. Funti custas is setzionis prevìdias de su Prémiu Natzionali de Literadura po sa Crialla Sardigna, bandiu de su Comunu de Thiniscòle. Podint pigai parti a su bandu is fainas publicadas e/o produsias intre su primu de su mesi de gennàrgiu de su 2008 e su 30 de su mesi de làmpadas de su 2012. Is autoris ant podi pigai parti a su prémiu scéti cun un’òpera po setzioni. Sighi a ligi ‘In Thiniscòle sa VI biennali de su Prémiu Natzionali de Literadura po sa Crialla Sardigna’