> aMpI presentat a su pópulu sardu su Paperi de Convergétzia Indipendentista « ilMinuto – notizie Mediterranee – edizione Sardegna

aMpI presentat a su pópulu sardu su Paperi de Convergétzia Indipendentista

(IlMinuto) – Casteddu, 26 de su mesi de martzu – Est stétia presentada sàbudu passau de a Manca pro s’Indipendetzia, in is aposentus de s’Hotel Mediterràneu de Casteddu, in d-una cuferéntzia de imprenta chi iat essi depi essi stétia unitaria, su Paperi de Convergétzia Indipendentista. Unu documentu chi bit sa luxi agoa de un’annu de traballu animau de unu dibàtidu políticu de importu mannu, fillu de visionis e anàlisi difarentis, chi cunfrontendusì ant donau sa vida a un’istrumentu istóricu, unu puntu de partentza po su caminu de liberamentu natzionali de su pópulu sardu. A sa scriidura de su Paperi ant difatis pigau parti, in prus de aMpI, puru ProgRes, Sardigna Natzione Indipendentzia, e, primu de fai sceberus diversus,  Paris Malu Entu puru. Unu caminu, su marcau de is fortzas indipendentistas, chi tenit comenti obietivu primu su de portai “sa Sardigna a foras de sa dipendéntzia económica e política de s’Itàlia”. S’arrasutau est unu documentu fatu in duas perras: is puntus de adesioni e is puntus de convergétzia. “Sa Sardigna est una natzioni, tenit sa cuscéntzia de s’identidadi colletiva natzionali bia, presenti e oberta a su tempus benidori: tenit unu territóriu cumunu e nodidu, una cultura, un’istória e una língua custas puru cumunas e nodidas”. Est cun sa descritzioni de sa Natzioni sarda chi s’oberrint is puntus de Adesioni analitzaus in su Paperi de Convergétzia Indipendentista. A sighiri is anàlis apitzus de: Indipendentzia, Soberania e Indipendentismu. S’oberrit imbecis cun sa chistioni de sa soberania linguística sa perra chi fueddat de is puntus de Convergétzia: “Sa Natzioni sarda tenit su diritu-doveri de impreai su sardu comenti língua natzionali, in su mantessi tempus tenit su diritu de promovi totus is línguas impitadas in su territóriu suu de is tzitadinus sardus”. Soberania asuba de s’istrutzioni e de sa cultura, soberania energética, militari e fiscali, soberania in is benis capitalis e in is trasportus, territorialidadi de sa pena, contienda cun su stadu italianu funt is puntus isvilupaus. “Su Paperi – pretzisat Cristiano Sabino, boxi de a Manca pro s’Indipendentzia – [...] depit essi canabi de lota, cunfrontu e dibàtidu. Sa convergétzia indipendentista depit essi fabricada, nci at a bolli tempus. Po nos s’apuntamentu chi benit est in Tièsi, su 27 e su 28 de su mesi de arbili, po Sa Die de sa Patria Sarda”.

© RIPRODUZIONE RISERVATA

0 Arrespustas a “aMpI presentat a su pópulu sardu su Paperi de Convergétzia Indipendentista”


Is cummentus funt serraus.