> Innu de Mameli a sa marolla in iscola. Is Contrariedadis de aMpI e de su PSd’Az « ilMinuto – notizie Mediterranee – edizione Sardegna

Innu de Mameli a sa marolla in iscola. Is Contrariedadis de aMpI e de su PSd’Az

(IlMinuto) – Casteddu, 8 de su mesi de martzu – Est de su 5 de su martzu sa nova ca s’innu de Mameli si preparat po intrai a sa marolla in is classis italianas. S’idea nascit de unu provedimentu fillu de sa Comissioni Cultura de sa Camera, chi impari a s’innu coativu in is iscolas previdit puru s’istitutzioni de una Diri de s’Unidadi natzionali, de sa Costitutzioni, e de sa bandera. Su provedimentu est acanta a sa raia, amancat scéti su parri de sa comissioni Afarius Costitutzionalis e agoa at a benni pedia sa legislativa. Unu caminu chi permitit, chentza de passai atressu de s’Áula, s’autorizatzioni de sa Camera. Totu custu naturalmenti po apressurai is tempus. In dógnia modu in Sardigna su Documentu a macru Pd e Pdl, chi previdit ca de su 2012-2013 in is iscolas de dógnia órdini e gradu, in s’ora de Citadinàntzia e Costitutzioni, siant aprontaus caminus didàticus e àteras propostas po “incidai sa reflèscia apitzus de is avenimentus e asuba de su sinnificau de su Risorgimentu”, no benit aghilliu de totus cun sa gala bera speddiada. “Cun arrealia beneus sciri ca su Parlamentu italianu s’est aparicendi a aprovai unu disignu de lei asuba de sa ‘Diri de s’Unidai natzionali, de sa Costitutzioni, de s’innu e de sa bandera’” afirmat su Diretivu políticu Natzionali de a Manca pro s’Indipendentzia. “In auséntzia de s’imparamentu de s’istória sarda in is iscolas, in mancàntzia de unu regimi de bilinguismu perfetu – acrarat su comunicau de imprenta imbiau de s’organizatzioni de sa manca indipendentista – in d-una cunditzioni fetiana de distintzioni ratziali e culturali de su pópulu de is Sardus, creeus chi custa proposta statali noa siat un’atu de gherra contra a s’identidadi natzionali nostra”. Cuntràrius puru is sardistas. “Pentzai de bolli cumandai po lei s’imparamentu a sa marolla de s’innu de Mameli est assurdu e istrambecu – declarat su segretàriu natzionali de su Partidu Sardu D’Atzioni Giovanni Angelo Colli -, sa Sardigna tenit giai s’innu suu ca est Procurade e Moderare Barone sa tirannia”, su PSd’Az duncas cumbidat a su presidenti de sa Regioni Sardigna Ugo a acastiai s’unidadi natzionali de su Pópulu sardu chi “nimancu 150 annus de istória italiana funt arrennescius a iscancellai”.

© RIPRODUZIONE RISERVATA

1 Arrespusta a “Innu de Mameli a sa marolla in iscola. Is Contrariedadis de aMpI e de su PSd’Az”


Is cummentus funt serraus.