> Trumbullu e arràbiu po arrestu menbrus comitau “S’Arriedu po Narabuja”. Sa solidariedadi de Sinistra Cristica Sarda, Zuncheddu Indipendentistas e Cordinamentu Precàrius Iscola Aristanis | ilMinuto

Trumbullu e arràbiu po arrestu menbrus comitau “S’Arriedu po Narabuja”. Sa solidariedadi de Sinistra Cristica Sarda, Zuncheddu Indipendentistas e Cordinamentu Precàrius Iscola Aristanis

(IlMinuto) – Casteddu, 2 de su mesi de martzu – Arrestaus lúnis a mangianu po violèntzia e arrepellada a Públicu Ufitziali, is duus manifestantis de su comitau “S’Arriedu po Narabuja”, Nello Schirru e su fillu Alessandro, funt stétiu cundennaus s’unu e s’àteru a duus e tres mesis po ai pigau parti a sa frimada de su cantieri innoi funt tucaus is traballus de fàbricu de s’impiantu fotovoltaicu de serras gigantis de s’EnerVitaBio de Ravenna. Is duus imputaus ant sceberau de patuiri otenedi aici is penas firmadas e sa cunditzionali. Su firmu e sa negoziatzioni de is duus manifestantis at intzitau is reatzionis de políticus e traballadoris sardus. ”Un’atu malibistu e de amaletzu grai meda, chi s’incuadrat in d-unu clima de repressioni de totus is movimentus chi nascint de bisóngius e de allacanamentu de is territóriu síngulus” cumentat Claudia Zuncheddu, Consilleri regionali Indipendentistas. “Su disacórdiu – sighit Zuncheddu – no podit essi afrontau comenti una chistioni de órdini públicu e de criminalidadi”. Apitzus de s’acontéssia fueddat puru Sinistra Critica Sarda: “Su furtuvoltaicu est a su mamentu un’apretu beru: Nello e Alessandro ant donau unu cuntributu personali e familiari mannu a custa lota! – narat su rapresentanti de su movimentu contra a su capitalismu Gianluigi Deiana – “est netzessàriu chi si fatzat unu fronti generali contra a su fotovoltaicu in messarítzia in Sardigna”. A su costau de Nello e Alessandro Schirru puru su cordinamentu precàrius de s’iscola de sa provìntzia de Aristanis, chi in d-unu comunicau de imprenta cumbidat a is sardus a sa difesa de is benis essentzialis: “Acatendusì comenti s’impiantu ocupit unu tretu mannu de territóriu fértili, bonificau e acuau cun dinai públicu, – acrarat sa nota scrita de su Cordinamentu – e comenti no siat prevìdia nisciuna bonífica e restoramentu de su territóriu a sa fini de su ciclu de vida de s’impiantu”, is precàrius de s’Iscola giudicant s’acontéssia comenti “un’àteru tentativu de impitai sa terra sarda cun is modus próprius de unu capitalismu de acrassadura”.

© RIPRODUZIONE RISERVATA

0 Arrespustas a “Trumbullu e arràbiu po arrestu menbrus comitau “S’Arriedu po Narabuja”. Sa solidariedadi de Sinistra Cristica Sarda, Zuncheddu Indipendentistas e Cordinamentu Precàrius Iscola Aristanis”


Is cummentus funt serraus.