> Binti spricullitaus po sa “sindrome de Cuirra”. Is Cumentus de “Sinistra critica sarda” e Claudia Zuncheddu « ilMinuto – notizie Mediterranee – edizione Sardegna

Binti spricullitaus po sa “sindrome de Cuirra”. Is Cumentus de “Sinistra critica sarda” e Claudia Zuncheddu

(IlMinuto) – Casteddu, 26 de su mesi de martzu – In is diris passadas sa procura de sa Reprúbica de Lanusèi at annutziau sa fini de is spricullitus asuba de s’impestadura a su poligonu de Cuirra. Binti personis iscruculadas: generalis, graduaus, ténnicus, piritus, datoris e su síndigu de Foghesu puru. Is úrtimus spricullitus, fatus apitzus de is corpus disinterraus de unus cantu de pastoris mortus in su territóriu, ant svelau sa preséntzia de “torio” radiuativu in is tessius. Impestadas, a cantu narant is averiguaduras, puru is depósitus de àcua chi alimentant is acuedotus po su bacu, in d-un’area aundi bivint 20milla personis. Apitzus de sa chistioni fueddant Sinistra Critica sarda e su consilleri regionali de is Indipendentistas Claudia Zuncheddu. “Custa est una diri importanti – scririt Sinistra Critica sarda – no scéti po is vìtimas, ma puru po is chi ant gherrau in custus annus po issus: is veterinàrius e is pastoris, is mobilitadas contra a sa militarizatzioni, is grupus indipendentistas e is boxis alientosas in sa surdesa de is istitutzionis, intre is calis amentaus de Mauro Bulgarelli e Gigi Malabarba in su Senau de sa Repúbrica. Est una diri importanti prusatotu po su Comitau “Gettiamo le basi”, po Mariella e po nos de Sinistra Critica”. “Sa bunífica de is giassus impestaus – scririt Zuncheddu – est a oi s’únicu aficu de traballu puliu po is populatzionis de su logu, chentza de custu sa mantessi messarítzia e pastoria funt cundennadas a morri po impestadura. Un’àtera borta s’annoat cun fortza sa serradura de su poligonu de Cuirra e sa trasformatzioni a impitu tzivili, comenti, po esémpiu, ’Tzentru de addestradura e cualificatzioni de sa protetzioni tzivili po totu su Mediterràneu e po s’Europa’”.

© RIPRODUZIONE RISERVATA

0 Arrespustas a “Binti spricullitaus po sa “sindrome de Cuirra”. Is Cumentus de “Sinistra critica sarda” e Claudia Zuncheddu”


Is cummentus funt serraus.