> 2012 mes’e arbili 26 | ilMinuto

Archíviu de sa diri 26/04/2012

“Su Sardu in tres paraulas”. Tucat in Tàtari su cursu de língua sarda aprontau de Su Majolu

(IlMinuto) – Casteddu, 26 de su mesi de arbili – At essi s’àula I (II pranu de su palatzu de arruga Zanfarino) de sa Facoltadi de Líteras de Tàtari a aghilliri su cursu de língua sarda “Su Sardu in tres paraulas”, chi at a cumentzai su 3 de su mesi de maju chi benit a is 10.00. Su cursu, in tres módulus, at essi obertu de Diegu Corràine, chi at a fueddai de su sardu istandard fadendi un’excursus de totus is propostas de is istandard linguísticus e ortogràficus chi funt stétias fatas de is annus ’70 fintzas a lompi a sa Lsc, chi at essi imparada a is scientis de issu etotu. Su segundu módulu, ddu at a fai Bruno Sini, e at a chistionai de sa comunicatzioni e de sa iscridura giornalistica in língua sarda. Tuchendi de su cunfrontu intre artículus e àterus paperis iscritus in sardu s’at a lompi a analizai is difaréntzias intre sa iscridura populari e s’iscridura arta, atesu duncas de sa língua fueddada. Su terzu e úrtimu módulu at essi fatu de Mario Puddu, chi at a amostai is difaréntzias foneticas de is diversas fueddadas e at a imparai a is scientis is fenómenus fonosintàticus de totus is variantis, amostendi is arrégulas útilis po normalitzai s’iscridura. Sighi a ligi ‘“Su Sardu in tres paraulas”. Tucat in Tàtari su cursu de língua sarda aprontau de Su Majolu’

Dudosus asuba de su tempus benidori is operàjus ocupant sa Sardinia Green Island

(IlMinuto) – Casteddu, 26 de su mesi de arbili – Chentza traballu de 39 mesis, no arricint sa càscia integratzioni de 90 diris. Funt is operàjus de sa ex Ineos Films, s’azienda chi, trasformada in su 2009 oi si lamat Sardinia Green Island e traballat in su cumpartu de is energias alternativas. S’ex Ineos Films oi lassat  is 90 traballadoris suus, torraus a cualificai cun is cursus regionalis, in sa duda de traballu prus niedda e no fait craresa asuba de su tempus benidori de is operàjus, chi po tenni arrespustas i essi ascurtaus ant ocupau sa fàbrica. Sighi a ligi ‘Dudosus asuba de su tempus benidori is operàjus ocupant sa Sardinia Green Island’

25 de su mesi de arbili: sa Polizia carrigat a is antifascistas. Pcl: “Est grai meda chi su Prefetu dongat a is fascistas sa possibilidadi de manifestai”

(IlMinuto) – Casteddu, 26 de su mesi de arbili – “S’ant sbaratzau de pratza a cropus de manganellus. Cuàturu fertus e de custus unu est finiu in s’ispidali. No amollaus. Is fascius ant a intendi comentisiollat sa preséntzia nostra”. Custus is fueddus scritus in Facebook ariseu a meigama abia de is 16 de una militanti antifascista casteddaia po denuntziai su chi est acontéssiu pagu minutus primu in pratza Gramsci, in Casteddu. Abia de is 15.30 sa polizia bistia de gherra iat carrigau a is militantis antifascistas chi iant circau de impediri – in sa diri de s’afestu de su Liberamentu de su nazifascismu – ai is personis de sa dereta estrema de ponni in su monumentu de carrera Sonnino una corona “in onori a is caius de sa Rsi”: sa Repúbrica de Benito Mussolini e Adolf Hitler. Apitzus de is fatus de ariseru fueddat atressu de una nota su Pcl. “Su Partidu comunista de is traballadoris – si ligit in su comunicau – denuntziat s’aciocu bregungiosu fatu a is antifascistas casteddaius de is fortzas de s’órdini, acontéssiu su 25 de su mesi de Arbili in pratza Gramsci in Casteddu. Sighi a ligi ’25 de su mesi de arbili: sa Polizia carrigat a is antifascistas. Pcl: “Est grai meda chi su Prefetu dongat a is fascistas sa possibilidadi de manifestai”’

“Sa Die de sa Sardigna”. In Casteddu atopu in sa biblioteca Regionali cun “Bilinguismu in famìlia”

(IlMinuto) – Casteddu, 26 de su mesi de arbili – Sàbudu 28 de su mesi de arbili, in is aposentus de sa biblioteca Regionali de s’arburada Trieste in Casteddu, a cumentzai de is 10.30 s’at a sboddiai un’atóbiu interessanti chi tenit comenti títulu “Bilinguismu in famìlia”, unu spuntu de reflèscia asuba de su multilinguismu in domu e in famìlia chi po s’ocasioni afestat Sa Die de sa Sardigna. Is traballus ant a lompi addia de s’ísula. Atressu de unu collegamentu Skype, difatis, sa Sardigna at essi collegada cun Edimburgo po allegai cun s’esperta de bilinguismu Antonella Sorace. Is traballus ant a sighiri cun diversus interventus apitzus de su tema. Sighi a ligi ‘“Sa Die de sa Sardigna”. In Casteddu atopu in sa biblioteca Regionali cun “Bilinguismu in famìlia”’

Tucat su seminàriu internatzionali aprontau de su Dipartimentu de Filologia, Literadura e Linguistica de s’Universidadi de is Istudius de Casteddu

(IlMinuto) – Casteddu, 26 de su mesi de arbili – Tenit comenti títulu “Pre-giornalismu, literadura populari. Línguas, testus e culturas in s’edadi moderna”. Su seminàriu s’at a tenni in s’àula 10 de sa Facoltadi de Líteras de s’Universidadi de Casteddu oi e su 27 de su mesi de arbili. Sa proposta, aprontada de su Dipartimentu de Filologia, Literadura e Linguistica de s’ateneu casteddaiu cun s’agiudu de sa Sociedad Internacional para el estudio de las Relaciones de sucesos e L’Arxiu de Tradicions de l’Alguer, presentat unu programma arricu de interventus. Su seminàriu at a cumentzai gióbia a merì a is 16.00, po sighiri su mengiau infatu. Sighi a ligi ‘Tucat su seminàriu internatzionali aprontau de su Dipartimentu de Filologia, Literadura e Linguistica de s’Universidadi de is Istudius de Casteddu’