> De 18 mesis suspendia sa pensioni a un’imbàlidu a su 100% | ilMinuto

De 18 mesis suspendia sa pensioni a un’imbàlidu a su 100%

(IlMinuto) – Casteddu, 23 de su mesi de arbili – Imbàlidu a su 100% a cantu narat su giudítziu de una Comissioni Asl “integrata” e de su méicu, F. F., malàdiu oncologicu de 67 annus, agoa 18 mesis de s’arreconnoscimentu de s’imbalididadi a oi, no at pigau un’euru. Asuba de s’acontéssia fueddat cun d-una nota de imprenta sa presidenti de s’assótziu Sotzialismu Diritus e Reformas Maria Grazia Caligaris. “S’ómini, chi at iscobertu sa maladia agoa de duus mesis de su collocamentu in pensioni at cumentzau deretu is setziadas de chemioterapia e is àteras curas sutaponendusì a unu trapiantu “autologo” de mueddu puru. Dógnia fasi de sa maladia est stétia documentada cun is relatas de is ricoverus in s’ispidali e cun is relatas de is ematologus”. Prusaprestu, in su 2010, po mori de una recaida, su malàdiu at presentau a s’Inps dimanda de impeoramentu. De custu mamentu est cumentzada una segunda marturia. Cun verbali provisóriu, su tzitadinu s’est biu recònosciri, difatis, s’imbalididadi totali e s’indennidadi de acumpangiamentu, cunfirmaus ambadus cun d-una aberguada afetanti aundiu s’Inps at torra dimandau da documentatzioni e una bisita de cuntrollu. Tamen, pretzisat sa presidenti de Sdr, su tzitadinu “no at otentu nudda”. “Candu est iscadessiu s’annu sa comissioni de s’Asl at fissau una bisita de cuntrollu noa e at cunfrimau imbalididadi totali e acumpangiamentu ma cussus diritus decretaus cun tres bisitas afetantis funt abarraus in su paperi. Fintzas a oi, agoa de 18 mesis, F. F no at arricu nudda. No si cumprendit duncas – concluit Caligaris – ita impedat a s’Istitutu de Previdéntzia de dispensai cantu depiu e poita in custas acontéssias no ddoi siat un’autoridadi chi impongat a s’Inps s’arrespetu de is leis”.

© RIPRODUZIONE RISERVATA

0 Arrespustas a “De 18 mesis suspendia sa pensioni a un’imbàlidu a su 100%”


Is cummentus funt serraus.