> 2012 mes’e làmpadas 13 | ilMinuto

Archíviu de sa diri 13/06/2012

Granarolo comporat Podda: aMpI “unu colossu italianu si ndi liat unu de is prodotus mellus de s’ecunumia nostra”

(IlMinuto) – Casteddu, 13 de su mesi de làmpadas – S’est concruiu su 27 de su mesi de maju passau s’acórdiu intre s’azienda de su casu, Podda de Casteddu e sa Granarolo Spa, azienda cuntrollada de unu cunsórtziu de 1.000 produtoris: su 77,48% de su Grupu est in is manus de su Cunsórtziu Granlatte, su 19,78% de is azionis est de Intesa San Paolo, su chi abarrat, est a nai su 2,74% est gestiu de Cooperlat. S’acórdiu intre is duus nòminis de su lati iat a depi ponni in is manus de Granarolo su 65% de s’impresa de Podda, firmendi unu convéniu chi no praxit a sa manca indipendentista sarda de a Manca pro s’Indipendentzia, chi commentat :”Unus cantu, is chi a oi acusant is efetus de s’imbriaghera natzionali apurida de is 150 annus italianus, tzerriant giai a una nàscida a nou de s’ecunumia sarda. Imbecis nos no si dda seus bufada, e arraxonaus in modu fridu e issentíficu, teneus un’àteru modu de ligi custa nova”. “Asuba de is industrialis ‘sardus’ ddoi est de nai meda, biu puru ca issus impitant su macru sardu scéti si ddis fait cómodu”. Difatis, ”is Pinna – sighit aMpI – iant a depi amparai su macru arveghinu, biu chi ndi cuntrollant su cunsórtziu – ma faint cuncurréntzia a su mantessi casu fadendiddu in Romania cun lati in prúiri. Sa birra Ichnusa est de sa Heineken comenti puru su licori de muta est unu prodotu sardu gestiu in Milanu”. Sighi a ligi ‘Granarolo comporat Podda: aMpI “unu colossu italianu si ndi liat unu de is prodotus mellus de s’ecunumia nostra”’

A sa XXI editzioni su Prémiu Remundu Piras

(IlMinuto) – Casteddu, 13 de su mesi de làmpadas – Lompit a s’XXI editzioni su Prémiu Remundu Piras, aprontau de s’assótziu culturali Interrios de Biddanòa cun s’agiudu de sa Regioni Autónoma de Sardigna, de sa Provìntzia de Tàtari e de su Comunu. Su prémiu si sboddiat in cuàturu setzionis. Sa primu, est po is iscientis de s’iscola elementari e média, i bit sa presentada de rétzitas in língua sarda registradas in d-unu dvd pitiu. Is protagonistas ant a depi fueddai ananti de una cinepresa chentza de ligi. S’interpretamentu depit durai de unu minimu de tres minutus a unu màssimu de seti minutus. Sa segunda setzioni, chi tenit sèmpiri comenti protagonistas is iscientis de is iscolas elementaris e médias, est dedicada a is poesias e a is contus. Sa terza est imbecis una setzioni oberta a is puetas sardus e a is chi benit de foras chi ant a depi presentai iscritus de poesia in rima in língua sarda. Is òperas no ant a depi essi stetias publicadas e no ant a depi essi stétias mai premiadas in àterus cuncursus. Sa cuarta e úrtima setzioni est po is puetas sardus nàscius o residentis in Biddanòa chi ant a depi presentai òperas in rima. Totus is setzionis funt a tema líberu. Is traballus de sa primu e de sa segunda setzioni ant a depi arribai a sa segreteria de su prémiu Remundu Piras, arruga Don Luisi Sturzo, 13 07019 Biddanòa, intru su 15 de su mesi de arbili de su 2013. Sighi a ligi ‘A sa XXI editzioni su Prémiu Remundu Piras’

“Torra in presoni s’ajaja casteddaia de 79 annus”. Sa denúntzia de Sotzialismu Diritus e Reformas

(IlMinuto) – Casteddu, 13 de su mesi de làmpadas – Una fémina de 79 annus, malàdia e po custu declarada in su 2009 no afatenti a abarrai in presoni, s’agatat torra inserrada in Buoncammino, in Casteddu. Ddu denuntziat Maria Grazia Caligaris, presidenti de s’assótziu Sotzialismu Diritus e Reformas, benendi a sciri ca S. M., casteddaia, est torrada in presoni poita, is cunditzionis de saludi, est bessiu a pillu in d-una vistia de controllu, no funt malas. Sighi a ligi ‘“Torra in presoni s’ajaja casteddaia de 79 annus”. Sa denúntzia de Sotzialismu Diritus e Reformas’

In Casteddu atopu cun Wine & Co.

(IlMinuto) – Casteddu, 13 de su mesi de làmpadas – Lúnis 25 de su mesi de làmpadas, at a tucai de is 16.00, in su Cafeo de is Artis de arruga de su “Fossario” in Casteddu s’avenimentu Wine & Co., unu merì totu dedicau a s’atastu de is binus fatus de is cantinas de F&B Service. S’avenimentu, aprontau cun s’agiudu de s’Assótziu Italianu Sommelier e s’Enoteca Casteddaia at a serrai a is 20.00 e at a presentai macrus de importu mannu intre is calis agataus Mulleri e Silvio Carta. Sighi a ligi ‘In Casteddu atopu cun Wine & Co.’