> aMpI contra a sa caserma de Pradu: “Fadeus unu movimentu de pópulu” | ilMinuto

aMpI contra a sa caserma de Pradu: “Fadeus unu movimentu de pópulu”

(IlMinuto) – Casteddu, 11 de su mesi de làmpadas – Sighit s’arregorta de is firmas promòvia de a Manca pro s’Indipendentzia po fai unu polu de soverania económica in Nùgoro comenti sceberu a sa militarizatzioni noa chi si cuncodrat a invadi sa tzitadi cun su fàbricu de sa caserma de Pradu. A faci de sa proposta de sa manca indipendentista s’arraspusta de is nugoresus de dógnia edadi est stètia bella meda. “Medas is mitus chi seus isciusciendi atressu de su cufrontu e de su chistionu a faci de pari cun sa genti – pretzisat una bota de imprenta de aMpI – seus cumentzendi a smuntai sa campagna e su pentzu nascius e mandaus ainnantis de annus meda de is partidus italianus”. Provìntzia e Comunu ant sèmpiri fueddau de su prexu mannu de sa genti po sa caserma noa. Difarenti imbecis s’iscumbatu bogau a pillu de sa manca indipendentista, chi pretzisat chi agoa de “un’inghitzu pagu bellu fillu de su scoramentu forti a petus de calisisiat tipu de tramuda sotziali” seus fadendi nasci in sa genti “cuscéntzia e gana de pigai parti a is determinus chi pertocant a su territóriu nostru e a su tempus benidori nostru”. aMpI no si frimat e cumbidat a “sa populatzioni a pesai su dibàtidu asuba de sa chistioni de sa militarizatzioni po acorrai s’ignoràntzia e su manixu de s’opinioni pública chi si fait tzeracus de nos etotu”.

© RIPRODUZIONE RISERVATA

0 Arrespustas a “aMpI contra a sa caserma de Pradu: “Fadeus unu movimentu de pópulu””


Is cummentus funt serraus.