> Friulanu in is iscolas. Su Comitadu: “Sardigna allupada de su disamparu e de s’arrialia de sa classi política italianista” | ilMinuto

Friulanu in is iscolas. Su Comitadu: “Sardigna allupada de su disamparu e de s’arrialia de sa classi política italianista”

(IlMinuto) – Casteddu, 12 de su mesi de làmpadas – De su mesi de cabudanni is istudiantis friulanus ant a podi istudiai sa língua insoru puru in iscola. S’imparamentu de su friulanu, difatis, at a imbucai comenti metéria insertada in s’oràriu de letzioni. S’at a tucai in s’annu iscolasticu 2012-2013 cun s’insertamentu de sa língua in is iscolas de sa crialla e in s’iscola elementari, e s’at a sighiri s’annu infatu cun is iscolas médias. Su Comitadu pro sa limba sarda si ndi prexat de s’arrisurtau bellu meda. “Custa fortuna – si ligit in d-una nota de imprenta de su Comitadu – faina de su traballu de su Movimentu linguìsticu friulanu ca in annus meda at tentu ascurtu e acotzu in is partidus políticus e in su Guvernu de sa Regioni Friuli, fait resaltai is tardamentus, is mancàntzias e is arrialias chi ddoi funt in Sardigna in is cunfrontus de s’imparamentu de sa língua sarda in is iscolas”. A dógnia modu in s’ísula “ddoi est i est faineri meda unu Partidu ‘trasversale’ contra a sa língua sarda, chi s’est amostau po fai un’esémpiu in is fatus acontéssius pagu tempus fait de s’arrefudu de s’Universidadi de Tàtari, de imparai sa língua sarda in s’oràriu de iscola, un’arrefudu mannu chi dd’at fatu renuntziai a is tres annus de finantziamentus regionalis, finantzimentus chi funt stétius perdius”. Prusaprestu, mancai is impedimentus, Su Comitadu pro sa limba no frimat, no mollat, ma afortiat sa faina sua de denúntzia in difesa de sa língua de is sardus.

© RIPRODUZIONE RISERVATA

0 Arrespustas a “Friulanu in is iscolas. Su Comitadu: “Sardigna allupada de su disamparu e de s’arrialia de sa classi política italianista””


Is cummentus funt serraus.