> Is giugis de sa Cassatzioni: “Su sardu no est una língua bera, est scéti unu dialetu”. aMpI: “Atacu grai meda a sa língua de su pópulu sardu” | ilMinuto

Is giugis de sa Cassatzioni: “Su sardu no est una língua bera, est scéti unu dialetu”. aMpI: “Atacu grai meda a sa língua de su pópulu sardu”

(IlMinuto) – Casteddu, 23 de su mesi de argiolas – No si firmat s’atacu de s’Itàlia a sa língua sarda. A pustis de sa ratífica a sa Carta europea de is línguas, sa raiadura de su sardu de sa spendig review, cida passada est lompia una senténtzia de sa Corti de Cassatzioni puru, innoia s’afirmat ca su sardu no est una língua ma unu dialetu, craramenti unu dialetu de sa língua italiana. Prusaprestu est s’artículu 6 de sa mantessi Costitutzioni italiana a nai ca “Sa Repúbrica amparat cun normas adatas a is minorias linguìsticas”. Ma no est totu, poita a esecutzioni de s’art. 6, s’art. 2 de sa lei 15 de su mesi de Paschixèdda de su 1999 n. 482, narat: “In atuatzioni de s’artículu 6 de sa Costitutzioni e in cuncórdiu cun is printzípius generalis istabilius de is organísimus europeus e internatzionalis, sa Repúbrica amparat a sa língua ea  sa cultura de is populatzionis albanesas, catalanas, germanicas, grecas, slovenas, e croatas e de is chi fueddant su francesu, su francu-proventzali, su friulanu, su ladinu, s’ocitanmu e su sardu”. Própriu su sardu est stétiu reconotu de sa Regioni Autónoma de Sardigna puru, cun lei regionali de su 15 de su mesi de ledàminis de su 1997 n. 26 in su relativu regulamentu esecutivu Dpr n. 345 de su 2 de su mesi de maju de su 2001. Calencunacosa duncas no torrat. Est possíbili chi is giugis de sa Corti de Cassatzioni no connosciant is leis de s’istadu de cussus etotu? Oburu s’agataus ainnantis de unu tentativu de raiadura de sa língua nostra? Po is indipendentistas de a Manca pro s’Indipendentzia su de sa Corti de Cassatzioni italiana est un “atacu grai meda a sa língua de su pópulu sardu i est su tentativu de ndi svalutai su patrimóniu culturali arricu e antigu meda”. “Boleus pretzisai – sighit sa nota firmada de sa manca indipendentista - ca sa língua sarda beniat impitada po scriri leis, documentus literàrius e po comunicai cun totus is tzivilidadis de su Mediterràneu […] primu meda de sa nàscida de s’istadu italianu e de sa mantessi língua italiana”.

Fotografia dealdoaldoz pigada de Flickr

© RIPRODUZIONE RISERVATA

0 Arrespustas a “Is giugis de sa Cassatzioni: “Su sardu no est una língua bera, est scéti unu dialetu”. aMpI: “Atacu grai meda a sa língua de su pópulu sardu””


Is cummentus funt serraus.