> Portovesme srl, una nui de anidridi tzulfarosa asuba de Portuascusi. Ambientalistas: “Cantu balit po is istitutzionis sa vida de chini bivit in s’area?” « ilMinuto – notizie Mediterranee – edizione Sardegna

Portovesme srl, una nui de anidridi tzulfarosa asuba de Portuascusi. Ambientalistas: “Cantu balit po is istitutzionis sa vida de chini bivit in s’area?”

(IlMinuto) – Casteddu, 16 de su mesi de argiolas – Allarmi ambienti a Portuascusi. Sàbudu a mangianu unu guastu a un’impintu de sa Portovesme srl at portau a sa fua de una nui manna de anidridi tzulfarosa chi, ispinta de su bentu, est lompia in su tzentru abitau de sa bidda de su Surcis-Igresienti. Su síndigu de Portuascusi, Giorgio Alimonda, e is sindacaus ant refrancau a sa polulatzioni. Est stétiu – est scritu in d-unu documentu sindacali arremonau de s’Unioni Sarda – “unu ‘acadessimentu banali’ chi no at fatu nisciunu dannu a s’ambienti e a is personis”. Ma po s’assótziu Adiquas, is “Carlofortini preoccupati” e a Manca pro s’Indipendentzia is contus no torrant. ”Is assótzius ambientalistas – si ligit in su comunicau de Adiquas e ‘Carlofortini preoccupati’ – cumentzant a si pediri cali siat su balimentu donau a sa vida de is personis chi bivint in custa area, e si dimandant poita is istitutzionis públicas sigant a essi latitantis, diventendi issas etotu conis, impari a is fabricas chi impestant, de is dannus fatus a sa saludi de totus is creaturas e a s’ambienti de su territóriu nostru”. “A Manca pro s’Indipendentzia – afirmat s’organizatzioni indipendentista de manca - arremaciat oi is responsabilidadis de sa Portovesme srl, ma puru e prusatotu is responsabilidadis de is aministratzionis de su logu e de is sindacaus chi, cun s’arreghèscia de amparai una pariga de postus de traballu, si citint asuba de is dannus berus fatus a su territóriu, a s’ecunumia sua e a sa saludi de chini ddoi bivit”

Fotografia de TheMadcapLaughs pigadas de Flickr

© RIPRODUZIONE RISERVATA

0 Arrespustas a “Portovesme srl, una nui de anidridi tzulfarosa asuba de Portuascusi. Ambientalistas: “Cantu balit po is istitutzionis sa vida de chini bivit in s’area?””


Is cummentus funt serraus.