> Casteddu. Est contienda asuba de is Villas de Monte Claro. aMpI: “Est unu progetu spaciu malu de su territóriu” | ilMinuto

Casteddu. Est contienda asuba de is Villas de Monte Claro. aMpI: “Est unu progetu spaciu malu de su territóriu”

(IlMinuto) – Casteddu, 30 de su mesi de austu – Ddu ant batiau is villas de Monte Claro i est su progetu edilitziu nàsciu de una bidea de sa Sotziedadi Coperativa Centu de Pauli. Unu pranu de lotizatzioni chi s’at sboddiai in duas areas mannas chi s’agatant a dereta e manca de arruga de is Valenzani in Casteddu e previdit su cumprimentu de villas e apartamentus residentzialis. Unu sceberu, su de su Comunu capoluogu de sa Sardigna, batacollau meda de sa manca indipendentista: ”In sa primu tzitadi de sa Sardigna [...] matoni e ciumentu no si funt frimaus nimancu a faci de sa crisi”, aici, sighit aMpI – “ant a nasci in Casteddu ‘is villas de Monte Claro’ [...] Fueddaus de is 60 domus unifamiliaris chi ant a ocupai s’area de dereta e de manca in sa perra bàscia de unu de is prus nódius prumonis birdis casteddaius, su Parcu provìntziali de Monte Claro. Su progetu no previdit scéti domus unifamiliaris, ma puru una fibera de villas chi ant a nasci ingíriu a unu parcu giardinu de forma circulari”. Unu progetu batacollau puru de su “Comitau po Pirri”, chi at denutziau a su Síndigu e a s’Assessori a s’Urbanistica sa destrossa ambientali chi custu ciumentu at a andai a fai, de su mamentu chi própriu in arruga Valenzani s’agatat un’istagnu chi fait de lacu naturali po s’amparu de su territóriu de is arriscus de is undamentus”.

© RIPRODUZIONE RISERVATA

0 Arrespustas a “Casteddu. Est contienda asuba de is Villas de Monte Claro. aMpI: “Est unu progetu spaciu malu de su territóriu””


Is cummentus funt serraus.