> “Iscuru s’anzone chi isettat latte dae su mariane”. Comitadu pro sa limba sarda àtera protesta « ilMinuto – notizie Mediterranee – edizione Sardegna

“Iscuru s’anzone chi isettat latte dae su mariane”. Comitadu pro sa limba sarda àtera protesta

(IlMinuto) – Casteddu 17 de su mesi de cabudanni – Fortzis in medas amentaus sa lítera de su 19 de su mesi de fiàrgiu passau cun sa cali su Comitadu pro sa limba sarda oberriàt sa campagna chi fadiat dimanda a su Presidenti Napolitano de intervenni in faori de s’aprovatzioni de su Paperi europeu de is línguas regionalis e de minoria. Una gherra chi no s’est mai frimada. Est difatis lompia luegu una segunda denúntzia, chi pedit s’aprovatzioni de su Paperi europeu de is línguas regionalis e de minoria e duncas s’avaloramentu de sa língua sarda e s’introdutzioni in is iscolas, in is média e in sa giustítzia, aici comenti istabiliu de is standard de su Consillu de Europa. A reguardu a sa chistioni at fueddau puru s’assessori regionali a sa Cultura Sergio Milia cun d-una lítera a totus is parlamentaris sardus, a manera chi siant issus a billai asuba de sa língua sarda presentendu argumentatzionis, propostas e mudíficas chi tenint s’iscopu de parificai su sardu a is línguas de s’àrea alpinu-francesa, tedescu, slovenu e ladinu – bias, in s’ipótesi de mudífica, línguas de serie A a petus de sa língua sarda, chi, impari a sa friulana e sa francu proventzali, benit cunsiderada língua de serie B. Sa boxi de su Comitadu pro sa limba sarda no si citit a faci de custa àtera ingiustitzia patia a dannu de sa língua de is Sardus po mori de parlamentaris sardus. “Su comitadu pro sa limba sarda – si ligit in d-una nota de imprenta – protestat po su cumportamentu ‘omissivo’ de unu númeru mannu de parlamentaris sardus in is cunfrontus de is diritus de sa minoria linguìstica sarda”. In manera negativa – acrarat balu su Comitadu – “de pagu s’est fatu connosci su parlamentari Pd Giulio Calvisi chi mancai fessat reladori in sa Comissioni V (impignada a donai unu parri ‘consultivo’ asuba de sa proposta de mudífica de su Paperi europeu de is línguas regionalis o de minoria aici comenti arribada de sa Comissioni cumpetenti) in s’interventu suu no at nimancu arremonau a sa língua sarda, comenti chi su problema no fessat esistiu. Únicu parlamentari sardu de sa Comissioni V, mancai reladori de sa proposta de lei, s’est amostau surdu e mudu a faci de is sollicitatzionis de totu sa sotziedadi sarda”.  Su Comitau at sèmpiri cumbidau a is parlamentaris “a s’ativai po straviai su ‘declassamento’ de sa língua sarda”, ma su sardu ”no est in is pentzus insoru, e in majoria, cun custu cumportamentu si funt arruolaus intre is nemigus de sa língua nostra e is babus de sa colonizatzioni e de s’assimilatzioni a sa marolla a língua italiana”.

© RIPRODUZIONE RISERVATA

0 Arrespustas a ““Iscuru s’anzone chi isettat latte dae su mariane”. Comitadu pro sa limba sarda àtera protesta”


Is cummentus funt serraus.