> Nuraxi Figus. aMpI: “Cun is minadoris po su territóriu”. Pcl: “declaraus gherra a chini serrat is postus de traballu” | ilMinuto

Nuraxi Figus. aMpI: “Cun is minadoris po su territóriu”. Pcl: “declaraus gherra a chini serrat is postus de traballu”

(IlMinuto) – Casteddu, 3 de su mesi de cabudanni – Est balu ocupatzioni in sa Carbosulcis de Nuraxi Figus, una de is úrtimus minieras chi traballant po su ”carbonfossile” in Europa, in d-unu territóriu, su de su Surcis, giai ispérdiu de sa crisi e de su disimpreu. “Est istrambecu comenti totinduna si siat fueddau de crisi in d-unu territóriu sèmpiri in crisi – afirmat a Manca pro s’Indipendentzia – [...] Innoia tempus fait de is fàbricas biviant 6mila famílias, oi su chi abarrat, no est scéti su disisperu de is traballadoris e su chi at fatu s’industrializatzioni foras de contu, ma est su prumu in su sàngui de is pipius, est su ludu arrúbiu in is costeras, mentris is imprendidoris mannus, agoa de s’essi prenus is buxacas de finantziamentus públicus, si funt fuius cun su spogliu”. Unu territóriu, custu, innoia is traballadoris, fertus de sa “cassaintegrazione”, s’agatant a afrontai su disimpreu, in d-unu mamentu istóricu aundi agatai traballu est difítzili po chinisiollat, e ddu diventat balu de prus po personis chi no funt prus giòvanas, chi cun fatiga ant agatai traballu in d-unu contestu delicau comenti cussu sardu. Própriu po custa arrexoni su “Partito Comunista dei Lavoratori” lamat cun d-una nota de imprenta “S’unidadi intre is traballadoris de is fàbricas de su Surcis cun is minadoris”, po ”ghiai sa lota trisinendu pastoris, artesanus e istudiantis, po allui sa rebellia sotziali, chi tuchendi de su Surcis depit fai arrui a di guvernu Monti e a s’Europa de is bancheris po oberri s’istrada a su guvernu de is traballadoris”. Diversu est su pentzu de sa manca indipendentista, chi, a su costau de is traballadoris ”trampaus de is giogus de is políticus e de is sindacaus italianus” afirmat de no s’acuntentai de donai solidariedadi inconditzionada. “Boleus donai solidariedadi inconditzionada o boleus agatai una solutzioni po is traballadoris sardus?”. A Manca pro s’Indipendentzia proponit duncas s’atuatzioni de unu progetu de bonífica lestru de sa zona e s’isvilupu de “unu modellu económicu diaderus sustenìbilis e de dura, capassu de donai traballu a is abitantis e de torrai a sa terra nostra e sa genti nostra sa dignidadi chi ddi minescit”

© RIPRODUZIONE RISERVATA

0 Arrespustas a “Nuraxi Figus. aMpI: “Cun is minadoris po su territóriu”. Pcl: “declaraus gherra a chini serrat is postus de traballu””


Is cummentus funt serraus.