> Progetu Lianora: Cumitau cívicu versus síndigu | ilMinuto

Progetu Lianora: Cumitau cívicu versus síndigu

(IlMinuto) – Casteddu 24 de su mesi de cabudanni – Martis 18 de su mesi de cabudanni, a pustis de su Consillu Comunali de Arborea, po su Progetu Lianora est lompiu su mamentu de sa craresa. S’assembrea cívica chi at atopau a is rapresentantis de sa comunidadi in provìntzia de Aristanis at difatis arreusau sa pregunta de su Cumitau No a Su Progetu Lianora chi dimandàt cun craresa s’imbiu de una lítera, indiritzada a sa Saras s.p.a, po ndi liai a su pranu de pertusamentu. “Su chi s’aministratzioni Comunali at bófiu nai – afirmant is membrus de su Cumitau – est stétiu craru: nos no seus interessaus inderetura”. In àterus fueddus – si pretzisat in d-una nota de imprenta - ”s’Aministratzioni Comunali de Arborea no est interessada inderetura in custa batalla po sa difesa de su territóriu [...] de sa destrossa ambientali de is barrinas de sa Saras”. In is fatus, cun custu determinu s’Aministratzioni andat contra a su chi at iscritu cussa etotu cun sa delíbera de su 7 de su mesi de maju passau, ”chi a custu puntu – sighit su cumitau – si bit po su chi est: unu documentu fatu chentza nisciuna cunvintzioni. Un’atu fatu po mori de sa prémida de s’opinioni pública de sa Delíbera Regionale de su 18 de su mesi de arbili de su 2012 chi at impostu s’avaloramentu de ‘Impatto’ Ambientali a su Progetu Lianora”. Sa giunta ghiada de su síndigu Pierfrancesco Garau, bullat a sa pregunta de imbiu de sa lítera a su Cda de sa Saras s.p.a., at determinau de no pigai in cunsidériu is apellus de su cumitau cívicu , chi no mollat sa lota e cummentat: “Nos eus a sighiri a difendi sa bidda nostra, is tzitadinus suus, su sistema económicu suu. Nos eus a sighiri a difedi a custa terra poita est sa terra nostra”.

© RIPRODUZIONE RISERVATA

0 Arrespustas a “Progetu Lianora: Cumitau cívicu versus síndigu”


Is cummentus funt serraus.