> De s’Itàlia taglius nous po sa Sardigna. Zuncheddu SardignaLibera: “funt un’arréula po nos sardus” | ilMinuto

De s’Itàlia taglius nous po sa Sardigna. Zuncheddu SardignaLibera: “funt un’arréula po nos sardus”

(IlMinuto) – Casteddu 11 de su mesi de ledàminis – Dinai liau asuba de dinai liau. Est custa sa política prevìdia de sa lei de assentu de su Guvernu Monti. Mancai s’autonomia, sa lei no lassat imuni a sa Sardigna, chi atacada de su Guvernu ténnicu torrat agoa. Un’assurdidadi bella e bona sa chi oi s’agatat a bivi su pópulu sardu: giai acradoris de s’Istadu italianu, is Sardus si bint arrancai àteras risorsas gràtzias a àterus taglius finantziòrius. Asuba de sa chistioni fueddat cun d-una nota de imprenta sa consillera indipendentista de SardignaLibera Claudia Zuncheddu, narendi ca sa “Manuvra Monti cuat sa boluntadi, giai espressada de su guvernu Berlusconi, de liai calisisiat tipu de Ispetzialidadi e Autonomia regionali, chi pertocat is cumpeténtzias primàrias de is Regionis Autónomas”. Sa crisi económica italiana angariat difatis a s’autonomia de s’ísula. “Is Sardus, con totus is istitutzionis políticas – sighit Zuncheddu – a cumentzai de su Consillu de sa Ras, depint arrafudai debressi custu àteru atacu a su diritu nostru de sceberai liberamenti su tempus benidori económicu, políticu e sotziali nostru. Nos sardus no podeus prus pagai sa crisi e su fallimentu italianu”.

© RIPRODUZIONE RISERVATA

0 Arrespustas a “De s’Itàlia taglius nous po sa Sardigna. Zuncheddu SardignaLibera: “funt un’arréula po nos sardus””


Is cummentus funt serraus.