> S’impulsu forti de sa Consulta Rivolutzionària. Atopus benientis | ilMinuto

S’impulsu forti de sa Consulta Rivolutzionària. Atopus benientis

(IlMinuto) – Casteddu, 5 de su mesi de ledàminis – No si frimat su traballu de sa Consulta Rivolutzionària. A pustis de Tramatza e Utieri ant essi Teulada su 6 de su mesi de ledàminis a is 19.00 in su Palatzeddu de s’isport, Silìcua s’8 in su “Montegranatico” a is 19.00, Pòrtu Turre su 9 in sa saba Filippo Canu in cursu Vitoriu Manueli a is 18.30, Lanusèi su 12 a is 10.30 in s’ititutu Enaip e in Ulìana a is 10.30 in s’auditorium de is iscolas médias is logus chi ant a aghilliri a is assembreas benientis. A pustis de ai firmau in Utieri su primu ordiminzu de puntus cundividius, zeurra de unu traballu chi at a cresci sèmpiri de prus e chi s’at a isvilupai e s’at a aprontai mellus in is atopus chi benint, is assembreas ordingiadas de sa Consulta ant a aghilliri a totus is fortzas netzessàrias po sa manifestada manna de su Pópulu sardu chi a intre de pagus tempus at a lompi in Casteddu pedendu is dimmissionis prontas de totus is consilleris regionalis, siat de majoria ca de opositzioni. “A sa destrossa fata de su colonialismu italianu – comentat in d-una nota de imprenta a Manca pro s’Indipendentzia – e de is paraímpius, sa Consulta arraspundit cun d-unus cantu de puntus istratégicus chi depint essi aplicaus debressi”. “Tres, cuàturu, cincu puntus ghia – aciungit Bustianu Cumpostu de Sardigna Natzione Indipendentzia – chi ant a depi rapresentai a totus is grupus chi faint parti de Consulta e chi ant a depi essi útilis a s’iscopu rivolutzionàriu de su programa chi est nascendi”. Sa sderrota económica, sotziali e de su traballu, filla de sa classi política e sindacali chi at guvernau a sa Sardigna de is annus ’50 a oi, funt s’impulsu mannu de sa furriada de unu pópulu chi bolit essi protagonista de su própriu tempus benidori.

© RIPRODUZIONE RISERVATA

0 Arrespustas a “S’impulsu forti de sa Consulta Rivolutzionària. Atopus benientis”


Is cummentus funt serraus.