> Sa vida longa de s’istagioni culturali de Serrenti | ilMinuto

Sa vida longa de s’istagioni culturali de Serrenti

(IlMinuto) – Casteddu, 26 de su mesi de ledàminis – At essi Giuliana Musso cun “Sa Fàbrica de is praidis” a oberri s’istagioni 2012/2013 de su Teatru de Serrenti. Su cartelloni at essi arricu e obertu a diversas formas artísticas i espressivas. S’istagioni longa at a cumentzai difatis sàbudu 27 de su mesi de ledàminis e at a sighiri fintzas a su mesi de su mesi de fiàrgiu de su 2013 cun d-unu programa de prosa, dantza, música, teatru in língua sarda, teatru po pipius. “Is isceberus artísticus po custa istagioni noa – si ligit in d-una nota de imprenta – funt indiritzaus prusatotu a unu públicu giòvanu, cun d-unu cunsidériu prus mannu po su mundu de sa música”. Su programa de ispetàculus at essi arricau de unus cantu de avenimentus collaterali. Primu de totu ddoi at essi logu po is produtzionis teatralis e po is residéntzias artísticas – Natalia Jimenez, Sa Comenta de Viviana, ‘Controforma’ de is serrentesas Silvia e Marta Bellu – chi ant a donai s’aficu de un’integratzioni e de un’iscàmbiu intre is comunidadis serrentesas e is artistas aghillius. De interessu mannu calencunu laboràtoriu puru, cosiu asuba de is “prodotus musicalis” chi faint parti de su progetu e@m2, finatziau de s’Anci e de sa Presidéntzia Consillu de is Ministrus-Dipartimentu de sa gioventudi, e ant a biri trisinaus a giòvanus meda de su territóriu. Su programa de su mesi de paschixèdda s’at a isboddiai inzitu de su nou, cun d-una rassegna de artis de isceberu in logus de isceberu: música e àteras formas de arti e ispetàculu at a allirgai is aposentus de is aziendas de Serrenti, ma puru – si pretzisat in d-unu comunicau – “àterus logus insolitus”

© RIPRODUZIONE RISERVATA

0 Arrespustas a “Sa vida longa de s’istagioni culturali de Serrenti”


Is cummentus funt serraus.