> S’ex “Bocciodromo” de Pòrtu Turre torrat a pigai vida cun Ncl | ilMinuto

S’ex “Bocciodromo” de Pòrtu Turre torrat a pigai vida cun Ncl

(IlMinuto) – Casteddu, 1 de su mesi de ledàminis – S’ex “Bocciodromo” de Pòrtu Turre torrat a pigai vida. A si dda torrai, cenàbara passau, cun sa màssima ”ocupai po liberai”, est su movimentu Ncl, “Noi Contro Loro”. S’istrutura de sa bidda de sa Sardigna de Tramuntana chi de diversus annus furiat posta mali imoi torrat a abidai e diventat unu Tzentru Sotziali Autogestiu. Istresiendi su discùidu, s’ex “Bocciodromo” si iat a depi difatis trasformai – si ligit in d-una nota de imprenta - in d-”unu Logu creativu e ‘aggregativo’, modernu e innovativu, prontu a si cunfrontai cun su valori traditzionali e arrexinau de sa tzitadi, atressu de programatzionis sèmpiri noas, didàticas e de serbítziu sotziali e culturali”. A petus de s’istadu de crisi chi ferrit a sa Sardigna, Ncl si furriat circhendi de avalorai sa tzitadi de Pòrtu Turre, una de is realidadis isulanas connotas po su disacatu e s’abandonu. “Su progetu pedit e fait afidamentu – pretzisat Ncl – in su cuntributu ativu e in s’acotzu morali de totus, chentza de Partidus e chentza de Pardinus”. “Seus cumbintus ca scéti donendi vida a unu raportu de solidariedadi cuncretu podeus fàbricai impari unu fornali chi, po sa primu borta in s’istória de custa tzitadi, fatzat e isvilupit progetus po totus”.

Fotografia de classicdreamer. Pigada de Flickr

© RIPRODUZIONE RISERVATA

0 Arrespustas a “S’ex “Bocciodromo” de Pòrtu Turre torrat a pigai vida cun Ncl”


Is cummentus funt serraus.