> “S’Istadu Itàlianu est su primu rebuseri”. In Casteddu manifestada po is permissus de tratenimentu | ilMinuto

“S’Istadu Itàlianu est su primu rebuseri”. In Casteddu manifestada po is permissus de tratenimentu

(IlMinuto) – Casteddu 11 de su mesi de ledàminis – Casteddu torrat in pratza contra a su ratzismu. Lúnis 15 de su mesi de ledàminis sa capitali de sa Sardigna at essi difatis protagonista de una manifestada, cun atopu in pratza de su Cramu a is 15.30, po nai ca nou a is rebuserias asuba de is permissus de tratenimentu, a is aciocus e a su ratzismu, po tzerriai impari “nisciunu est cuau” e po pretèndiri diritus, dignidadi e citadinàntzia po is furesteris. Sa protesta nascit de s’insustenìbili data, su 15 de su mesi de ledàminis, fissada po sa santoria asuba de is permissus de tratenimentu. Un’iscadéntzia cun preguntas impossíbilis de apagnai in pagu tempus. Boleus – afirmant is aprontadoris de sa manifestada – “chi siat torrada a oberri s’iscadéntzia cun cunditzionis prus giuditziosas po fai otèniri a totus is furesteris is documentus de tratenimentu”. Su corteu de protesta at a fai intendi sa própriu boxi contra a su Cpa de Su Masu puru dimandendindi debressi sa serradura. Su caminu de sa manifestada at a atraversai: arruga Roma, arburada Carlo Felice, pratza Yenne, arruga Manno, pratza Costituzioni, arruga de su Fossario e at a lompi in pratza Palatzu, a faci de su Palatzu Vicerégiu, domu de sa Prefettura.

© RIPRODUZIONE RISERVATA

0 Arrespustas a ““S’Istadu Itàlianu est su primu rebuseri”. In Casteddu manifestada po is permissus de tratenimentu”


Is cummentus funt serraus.