> Zonas úmidas: su Consillu Regionali aprovat una norma chi amenguat is mesuras de amparu « ilMinuto – notizie Mediterranee – edizione Sardegna

Zonas úmidas: su Consillu Regionali aprovat una norma chi amenguat is mesuras de amparu

(IlMinuto) – Casteddu, 10 de su mesi de ledàminis – Opugnat cun is normas de su códixi de su paisagiu sa lei chi su Consillu regionali de sa Sardigna at aprovau su 4 de su mesi de ledàminis passau cun 43 votus de sa majoria in faori. Su provedimentu tenit s’iscopu de amenguai a is mesuras de amparu ingíriu a totus is zonas úmidas. Su disignu de lei regionali presentau su mesi de làmpadas passau parrit ignorai a sa senténtzia de su Consillu de Istadu – sez. IV, 16 de su mesi de arbili de su 2012, n. 2188 – . In pagus fueddus, su Consillu de Istadu at ordinau ca su tretu de salvaguàrdia generali de is 300 metrus si depit istèrriri a totus is zonas úmidas puru, duncas totus is interventus propostus in custu campu depint essi sotimitius a permissu “paesaggistica”. Sa Giunta afirmat ca custa norma noa est netzessòria po salvai is fàbricus fatus in is orus de is istànius, lagunas e salinas. Prusaprestu su Grupu de Interventu Giurídicu in su giassu suu iscririt ca “s’arrexoni bera de custa àtera proa de sa boluntadi ‘cementificatrice’ de sa Giunta Cappellacci e de sa majoria consiliari sua s’agatat in sa boluntadi de evitai s’apricu de una normativa de amparu beni insertada in su códixi de is benis culturalis e de su paisagiu”. Est in difesa de su territóriu ca is assótziu ecologistas Grupu de Interventu Giurídicu e Amigus de sa Terra ant a avanzai un’istàntzia a su Guvernu a manera chi promovat recursu a sa Corti costitutzionali contra a una lei regionali “chi fait dannu a is cumpeténtzias istatalis in matéria de amparu de s’ambienti e de su paisagiu”.

Fotografia de finieddu. Pigada de Flickr

© RIPRODUZIONE RISERVATA

0 Arrespustas a “Zonas úmidas: su Consillu Regionali aprovat una norma chi amenguat is mesuras de amparu”


Is cummentus funt serraus.