> “No a su ‘termodinamico’ in Campu Giavesu”. Una petitzioni denuntziat a is arriscus de su progetu, giai 500 firmas pigadas | ilMinuto

“No a su ‘termodinamico’ in Campu Giavesu”. Una petitzioni denuntziat a is arriscus de su progetu, giai 500 firmas pigadas

(IlMinuto)- Casteddu, 6 de su mesi de totusantus – Amanniat sa contrariedadi a su cumprimentu de su progetu “termodinamico” de s’Energogreen Renewables srl in sa campura de Campu Giavesu. Funt difatis giai 467 is firmas pigadas po acotzai a sa petitzioni on line contra a su progetu chi – narant is aprontadoris – “iat a podi destrossai po sèmpiri su territóriu Cossoine e Tzàve”. “Unu determinu aici importanti – si ligit in sa petitzioni – no depit interessai scéti a is pagus meris de is terrenus trisinaus”. Po is firmatàrius is biddas trisinadas iant a perdi difatis sa possibilidadi de isfrutai sa campura po iscopus agriculus e de pastoria e iat essi a arriscu s’aprovistamentu ídricu de Cossoine. Sa petitzioni denuntziat puru a is arriscus acapiaus a su fàbricu de sa tzentrali a “biomasse” chi iat a depi afiancai a s’impiantu “termodinamico”. Is aprontadoris de sa petitzioni pedint duncas atressu de un’apellu de firmai po “no lassai a is inzénnerus chi benint in eredadi unu panorama de isprigus e parabolas orbigadas, una campura arruinada […] de tonneladas de materialis difítzili de dissipai, unu territóriu, in d-una manera o in s’àtera, impestau”.

© RIPRODUZIONE RISERVATA

0 Arrespustas a ““No a su ‘termodinamico’ in Campu Giavesu”. Una petitzioni denuntziat a is arriscus de su progetu, giai 500 firmas pigadas”


Is cummentus funt serraus.