> 2012 mes’e totussantus 15 | ilMinuto

Archíviu de sa diri 15/11/2012

Presonis. 2118 presoneris, 901 furisteris e 470 in abetu de giudítziu: benebéniu in Sardigna

(IlMinuto) – Casteddu, 15 de su mesi de totusantus – Custa est sa Sardigna: 12 istitutus penitentziàrius cun 2.118 personis a petus de 2007 postus letu, 901 presoneris furisteris e 470 carceraus in abetu de giudítziu, 215 de is calis no funt galu aparessius ananti de su Gip. Su númeru de is presoneris definitivu est de 1.629. Funt is datus fatus conosci de su Dipartimentu de s’Aministratzioni Penitentziària, isprigu de sa cunditzioni de is presonis a su 31 de su mesi de ledàminis de su 2012. Una situatzioni chi registrat – pretzisat Maria Grazia Caligaris, presidenti de s’assótziu Sotzialismu Diritus e Reformas – “un’aumentu costanti aintru de is galeras de tzitadinus furisteris e de personis chi abetant mesis meda po tenni unu primu giudítziu. Innotzentis, fintzas a proa contrària, chi patint un’istrobu grai prusatotu in logus cun genti meda comenti su presoni de Buoncammino de Casteddu”. “Sovrafollamento” chi, comenti est naturali, fait bivi mali meda a is presoneris chi s’agatant aintru de is istruturas penitentziàrias de s’ísula. Sighi a ligi ‘Presonis. 2118 presoneris, 901 furisteris e 470 in abetu de giudítziu: benebéniu in Sardigna’

Manifestada de su 13 de su mesi totusantus: su’annotada de Onnis Presidenti de Progetu Repùblica

(IlMinuto) – Casteddu, 15 de su mesi de totusantus – “Candu su poderi costituiu si ndi fuit in elicòteru bolit nai ca is cosas funt giai mudadas”. Est cantu afirmat Omar Onnis, Presidenti ProgReS Progetu Repùblica de Sardigna cumentendi a sa diri de protesta chi lúnis passau at amostau sa faci de una Sardigna chi bolit torrai a nasci. “No est prus tempus de trampas (e “autoinganni”), est tempus de solutzionis ‘strutturali’”, acrarat Onnis. Po su presidenti de ProgReS est difatis apretosu e netzessàriu a ponni is famílias in is cunditzionis de bivi cun dignidadi. Ma no est totu innoi: est puru doverosu bonificai is territórius po podi fai cresci a su mellus is atividadis produtivas. A s’acabada tocat puntai, segundu s’arretzeta de Progetu Repùblica, a “regenerai totus is raportus umanus, culturalis i económicus chi sa crisi longa at indebilitau o truncau”. “No ddu at a podi fai sa política italiana, e nimancu sa política sarda chi arraspundit a sa política italiana (e a is interessus italianus). – pretzisat Onnis – Forsis asumancu asuba de custu puntu is cuscéntzias cumentzant a si ndi scidai de s’aborticadura”. Sighi a ligi ‘Manifestada de su 13 de su mesi totusantus: su’annotada de Onnis Presidenti de Progetu Repùblica’

S’Assessorau de su Traballu sceberat progetus de profetu sotziali

(IlMinuto) – Casteddu, 15 de su mesi de totusantus – Assótzius de promotzioni sotziali, coperativas sotzialis, assótzius de voluntariau, organizatzionis chi no funt governativas. Funt is destinatàrius de su bandu “Serbítziu Cívicu Volonteri”, publicau de s’Assessorau de su Traballu in méritu a is interventus po s’annu 2012. Iscopu de s’avisu est afortiai a s’isvilupu de su serbítziu cívicu volonteri. Su sceberu de is progetus est indiritzau scéti a is assótzius, a is coperativas e a is organitzatzionis chi no funt governativas cun domu legali in Sardigna e chi traballant in is cumpartus de s’assistu sotziali e sótziu sanitàriu, de s’anestru e promotzioni culturali, de s’amparu e avaloramentu de s’ambienti e in àterus cumpartus de interessu sotziali, ambientali e culturali. Is progetus ant a depi durai 12 mesis e ant a depi trisinai a is personis chi no tenint traballu e chi funt residentis in Sardigna, chi apant fatu 18 annus e siant in edadi de podi traballai e chi intrint in d-una de is categorias prevìdias de s’avisu públicu: mannus, féminas, “fasce” débilis, giòvanus disimperaus cun o chentza de títulu de istúdiu e chi tengant un’edadi intre is 18 e is 32 annus, giòvanus beneficiàrius de su Pranu istraordinàriu po s’ocupatzioni de su 2011 insertaus in sa graduatória e galu chentza de essi stétius pigaus in progetus de profetu sotziali. Sighi a ligi ‘S’Assessorau de su Traballu sceberat progetus de profetu sotziali’

In Cossoine su banchitu de su Prc po pigai firmas referendum

(IlMinuto) – Casteddu, 15 de su mesi de totusantus – Cumentzat de Cossoine sàbudu 17 de su mesi de totusantus de is 10.00 a is 12.00 in pratza Gabellotu s’arregorta de is firmas de is comunus de su Meilogu po is referendum asuba de su traballu e de is pensionis. Una campagna mandada ainnantis de unu comitau mannu chi po su Meilogu bit s’adesioni de is militantis de Rifondatzioni comunista de su tzírculu “Farore Sini”. Sighi a ligi ‘In Cossoine su banchitu de su Prc po pigai firmas referendum’

In Abas “Geppe e is àterus – Istória de vida de unu cumandanti partesanu sardu”

(IlMinuto) – Casteddu, 15 de su mesi de totusantus – Sàbudu 17 de su mesi de totusantus, in is aposentus de s’ex cineteatru parrochiali de Abas, a is 17.00 su proietori at a amostai in s’ischermu is màginis de su film “Geppe e is àterus – Istória de vida de unu cumandanti partesanu sardu”, de Francesco Bachis, Giuseppe Caboni, Francesco Capuzzi, Walter Falgio e Laura Stochino. Unu film fatu in su 2012 de s’Issra e de su Lev (Laboratoriu de etnogràfia visiva de s’Universidadi de Casteddu), totu chentza de dinai públicu. A presentai sa proietzioni ant essi Walter Falgio e Francesco Bachis. S’avenimentu, aprontau de sa Biblioteca Gramsciana Onlus e de su Círculu Cultura Cinematogràfica Fitzcarraldo Abas cun s’agiudu de su Comunu de Abas, de s’Issra e de su Lev at a biri sa preséntzia de su protagonista puru de sa pellícula, su partesanu Nino Garau. Sighi a ligi ‘In Abas “Geppe e is àterus – Istória de vida de unu cumandanti partesanu sardu”’