> 2012 mes’e totussantus 19 | ilMinuto

Archíviu de sa diri 19/11/2012

Salvatore Usala: is 16.00 “custa est s’ora de sa morti mia”

(IlMinuto) – Casteddu, 19 de su mesi de totussantus – At a tucai custu merì Salvatore Usala, acumpangiau de pobidda e de duus agiudantis. Puntu de arribu: Roma. At a pigai sa nai po si presentai a is 9.30 de mérculis 21 de su mesi de totussantus a petus de su Ministériu de s’Ecunumia, in bia XX Cabudanni. Usala de su 2004 est malàdiu grai meda de Sla, e de sa nàscida sua, est sa boxi de s’Assótziu 16 totussantus. Mérculis chi benit at a abetai de essi aghilliu de is Ministrus po sciri scedas asuba de su dinai chi su Guvernu iat a depi indiritzai a sa “non autosufficienza”. Po is màladius grais funt difatis stétius impegnaus scéti 200milionis, tzifra chi afligit a una chistioni grai meda, chi pertocat a dexinas de migliaris de famílias. “No si ndi fadeus nudda de sa limúsina insoru, cussus 200milionis po is malàdius ‘non autosufficienti’ chi s’ant propostu funt una bregúngia e un’afrenta” afirmat Usala, chi ananti de s’agràbiu chi ddu bit protagonista impari a is àterus malàdius grais meda afirmat. “Si sa situatzioni no si sblocat, a is 16 no totrru a carrigai is baterias de is istrumentus chi mi faint abarrai in vida. Sighi a ligi ‘Salvatore Usala: is 16.00 “custa est s’ora de sa morti mia”’

“Pilastru de sa difesa”: su maceddu de su pópulu palestinesu

(IlMinuto) – Casteddu, 19 de su mesi de totussantus – Galu una borta sa Tira de Gaza s’agatat abrancada de s’esértzitu israelianu. “Pilastru de sa difesa” est su nòmini chi Israeli at donau a s’operatzioni chi est cumentzada su 14 de su mesi de totussantus passau e chi est degogliendi a su pópulu palestinesu. Sa bivia de sa Palestina est un’àtera escalation de fúria chi ferrit chentza de asséliu a un’area destrossada annus fait de s’operatzioni militari batiada ”Prumu Fundiu”. Po chistionai de is acirradas israelianas in sa Tira de Gaza s’assótziu Sardigna Palestina e s’Unioni Democràtica Arabu Palestinesa – Udap aprontant po oi a is 18.00 un’atopu in sa domu de arruga Montesanto 28 in Casteddu. “Gaza ita fai?” est su títulu de sa proposta. “Esus a arrexonai de sa situatzioni chi est bivendi sa Palestina e de s’iscenàriu chi si proponit oindì a sa Comunidadi Internatzionali”, si ligit in d-una nota de imprenta. Sighi a ligi ‘“Pilastru de sa difesa”: su maceddu de su pópulu palestinesu’

Su Colletivu de is istudiantis Antonio Gramsci s’arrebellat e ocupat

(IlMinuto) – Casteddu, 19 de su mesi de totussantus – Funt is 20.43 de cenàbara 16 de su mesi de totussantus candu in redatzioni lompit unu comunicau de imprenta firmau Colletivu de is istudiantis Antonio Gramsci. Chini ddoi est a pabas de custa firma? Ddoi funt is piciocus de su litzeu Classicu De Castro de Aristanis, giòvanus in lota po unu tempus benidoris prus bellu. “In custus iscàmpius su Colletivu de is istudiantis Antonio Gramsci at ocupau a su Litzeu Classicu De Castro” – si podit ligi in sa nota de imprenta – “Agoa de is manifestadas ispantosas e mannas de su 14 de su mesi de totussantus chi ant iscutuau a totu s’Europa, eus amostau sa fortza de is pretesas nostras chi boleus sighiri a mandai ainnantis po totu s’atóngiu e prus”. Is giòvanus pigant in manu sa situatzioni, blocant is letzionis e cumentzant s”autogestione’ e s’ocupatzioni de s’Istitutu. Ddu faint po si ndi torrai a pigai su chi ddis est stétiu liau de is políticas de privatizatzioni: “Boleus frimai a su progetu de lei Aprea, acotzau in manera bipartisan, – afirmant in sa nota de imprenta – chi permitit s’intrada de is privaus in is iscolas nostras, amenguat a is diritus de is istudiantis, ‘deregolamenta’ a is assembreas de Istitutu e ‘balcanizza’ a s’iscola pública asugetendidda una borta po sèmpiri a sa lei de Mercau”. Sighi a ligi ‘Su Colletivu de is istudiantis Antonio Gramsci s’arrebellat e ocupat’

Senténtzia istórica apitzus de s’ignoràntzia de sa lei 40. Satisfau Uaar Casteddu

(IlMinuto) – Casteddu, 19 de su mesi de totussantus – Espressat prexu mannu su círculu Uaar de Casteddu a petus de sa senténtzia ca su Tribunali de sa primu tzitadi de s’ísula at donau in faori de una copia de talassemicus, a is calis at essi permítiu de fai sa diàgnosi “preimpianto” de is zeurras. Sighi a ligi ‘Senténtzia istórica apitzus de s’ignoràntzia de sa lei 40. Satisfau Uaar Casteddu’

Sa Sardigna licoinàrgia benit premiada de is Ghias Michelin

(IlMinuto) – Casteddu, 19 de su mesi de totussantus – Un prémiu de importu mannu, su pigau de tres ristorantis sardus, “Sa Ghinghetta” de Portescùsi, Andreini de S’Alighera e “S’Apposentu” de Domu Puddu in Siddi, chi funt stétius arrecumpentzaus cun su prémiu nódiu de is ghias Michelin, intre is prus connotas in su campu “enogastronomico”. Sighi a ligi ‘Sa Sardigna licoinàrgia benit premiada de is Ghias Michelin’