> 2012 mes’e totussantus 29 | ilMinuto

Archíviu de sa diri 29/11/2012

Impestadura: in Carloforte su dibàtidu “Portovesme vs Taranto”

(IlMinuto) – Casteddu, 29 de su mesi de totussantus – “Portovesme vs Taranto: Bunífica lestra: impestadura ambientali e saludi pública”. Unu títulu longu po fueddai de s’impestadura ocasionada s’una de sa Portovesme srl e s’àtera de s’Ilva. S’atopu, aprontau de su Comitau Carlofortinus Apensamentaus de su grupu ”Tabarchin pau ben in cumun”, est fissau po sàbudu primu de su mesi de paschixèdda a is 18.00 in su Tzíne-Teatru Cavallera de Carloforte. A ghiai su dibàtidu at essi su giornalista Rai Tg3 Alfredo D’Amato. Reladoris: Stefano Deliperi de su Grupu de Interventu Giurídicu e Amigus de sa Terra, Angelo Bonelli, consilleri comunali de Taranto e presidenti natzionali de sa Federatzioni de is Birdis, Claudia Zuncheddu, méicu e consilleri regionali de Sardigna Libera e Vincenzo Migaleddu, presidenti de s’assótziu Méicus po s’Ambienti. Sighi a ligi ‘Impestadura: in Carloforte su dibàtidu “Portovesme vs Taranto”’

Unu domínigu de traballu. Is maistus sardus no si frimant

(IlMinuto) – Casteddu, 29 de su mesi de totussantus – Insolita sa protesta chi at moviu a sa Tzitadi de Casteddu unus cantu de diri fait. Protagonistas is maistus de dógnia órdini e gradu chi si funt agataus domínigu a mangianu a is 10.00 in is iscaleras de Boaira po curregi is cómpitus. Unu mangianu de traballu, su de su 25 de su mesi de totussantus passau, chi at biu una centina de professoris fai sa professioni insoru a foras de is domus, a amostai ca is fainas de traballu de unu maistu no acabant cun is letzionis in àula. Funt diversas difatis is oras chi dógnia professori dedicat in d-una cida a sa curretzioni de is cómpitus, a sa programatzioni e a s’amaniada de is letzionis. Cun sa manifestada insolita is maistus artziant sa conca e narat ca nono a is irminorigamentus e sa proposta fata de su Guvernu Monti de aumentai s’oràriu de traballu insoru de 18 a 24 oras a sa cida. Sa genti est stétia informada de sa situatzioni chi pendit asuba de s’iscola cun d-unu bolantinu innoia ddoi furiat una tavèglia cun is càlculus de is oras de traballu de unu maistu, chi impitat 50 oras a sa cida po fai cun seriedadi s’atividadi sua. Sighi a ligi ‘Unu domínigu de traballu. Is maistus sardus no si frimant’

Caboris in Música: su progetu de annestru a sa música po pipius

(IlMinuto) – Casteddu, 29 de su mesi de totussantus – Sa Biblioteca comunali Grassia Deledda de Lungone aderit a “Nàscius po sa Música”, unu progetu dedicau a is pipius chi andant de is 0 a is 6 annus po ddis fai connosci sa cultura musicali. Sa proposta est fata cun s’agiudu de su Tzentru po sa Saludi de su Pipiu, s’Assótziu culturali pediatras, s’Assótziu Italianu Bibliotecas e s’iscola de sa bidda. Su progetu, chi previdit unu programa arricu, s’at a isboddiai de su 6 a su 28 de su mesi de paschixèdda e s’at a intitulai “Caboris in Música”. Sighi a ligi ‘Caboris in Música: su progetu de annestru a sa música po pipius’

In Samassi “Calidadi e pranus de impresa in su cumpartu ‘ortofrutticolo’”

(IlMinuto) – Casteddu, 29 de su mesi de totussantus – S’at a isboddiai su 30 de su mesi de totussantus, in is aposentus de sa saba consiliari, su cunvegnu aprontau de s’Agentzia Laore, chi s’intitulat “Calidadi e pranus de impresa in su cumpartu ‘ortofrutticolo’”. Mannu su programa de sa diri. Agoa de is registratzionis de is chi ant a pigai parti a sa cosa, prevìdia po is 16.30, e a pustis de is saludus de is autoridadis, s’atopu at a biri is relatus de Marco Deligia, Gianvittorio Sale, Tommaso Betza e Piero Aldo Liori de s’Agentzia Laore e su de Monica Ghironi, Consulenti de diretzioni e pranus Aziendalis. Sighi a ligi ‘In Samassi “Calidadi e pranus de impresa in su cumpartu ‘ortofrutticolo’”’

Usb a su costau de is precàrius Csl e Cesil in presídiu

(IlMinuto) – Casteddu, 29 de su mesi de totussantus – Torrant in pratza is fantàsimus de su precariau e ddu faint cun d-una manifestada ‘autoconvocata’. Is precàrius de is Tzentrus serbítzius po su traballu (Csl) e de is Tzentrus serbítzius insertamentu (Cesil) si funt difatis donaus atopu po oi a is 10.00 in bia Roma asuta de su Consillu regionali: ant a protestai aparicendi banchitus in rapresentàntzia de is fainas de traballu insoru. Asuba de is mesas ant essi postus in manera simbòlica is serbítzius de su traballu po disimperau e is pedonis. “In pratza poneus is beridadis nostras!”, afirmant cun determinu is traballadoris Csl e Cesil. Est de is diris passadas, difatis, s’impugnamentu de parti de su guvernu de sa lei regionali n. 17 de su 13/09/2012, chi arregulat su finantziamentu a is entis de su territóriu po su funtzionamentu de is Csl e de is Cesil. S’arriscant in totu 663 postus de traballu. 663 personis s’ant a podi biri annulada sa conoscéntzia e sa cumpeténtzia fata in annus meda de precariau istóricu. Sighi a ligi ‘Usb a su costau de is precàrius Csl e Cesil in presídiu’