> Su Prémiu Alziator si ndi scarescit de sa língua sarda. Su Comitadu: “‘provincialismo autocolonizzante’ casteddaiu” | ilMinuto

Su Prémiu Alziator si ndi scarescit de sa língua sarda. Su Comitadu: “‘provincialismo autocolonizzante’ casteddaiu”

(IlMinuto)- Casteddu, 6 de su mesi de totusantus – Su Prémiu Literàriu Frantziscu Alziator escludit, allacanendidda, a sa língua sarda. S’avenimentu culturali aprontau de su Comunu de Casteddu po afestai a s’intelletuali sagista e iscritori mortu in su 1977 arretirat difatis in su cadàsciu a sa língua de su pópulu Sardu. A denuntziai s’agràbiu mannu a sa cultura e a sa língua de sa Sardigna est Su Comitadu pro sa limba sarda. Una serradura acapiada – si ligit in d-una nota de imprenta – a “unu cetu intelletuali ‘italocentrico’ chi si a bias s’amostat in faori de sa cultura e língua de is sardus, in sa pràtiga oponit a una citadinàntzia sua normali e no asugetada una pràtiga de arrefudu e asoladura”. Unu fatu galu prus grai de su mamentu chi su regulamentu de su Prémiu Alziator previdit una setzioni ispeciali po òperas imprentadas in língua italiana e de autoris chi no funt italianus e chi benint de is territórius de su Mediterràneu, setzioni innoia podint pigai parti òperas iscritas in sa língua de bratzolu a patu chi siant acumpangiadas de sa furriadura in italianu. “In manera assurda – pretzisat Su Comitadu – custa régula escludit a is autori sardus chi s’espressant in sa própriu língua de bratzolu, est a nai in língua sarda o in is àteras línguas de minoria fueddadas e iscritas in Sardigna, poita mancai siant mediterràneus funt tzitadinus italianus”. Seus a petus de ategiamentus chi – pretzisat sa nota de imprenta – “favoressint a sa colonizatzioni linguìstica e a s’autocolonialismu culturali e s’oponint a su protzessu de renascida de sa língua sarda e de sa ‘ufficializzazione’ e parificatzioni sua cun sa língua italiana, iscopu de su Movimentu linguìsticu sardu”. S’ispériu de Su Comitadu est chi de s’editzioni de su 2013 su Prémiu Alziator insertit una setzioni in sardu e in is línguas ”alloglotte” fueddadas e iscritas in s’ísula. Unu passu de importu mannu “po pigai parti – concluit su comunicau – a su protzessu prus mannu de soberania de is sardus chi agatat sa fortza netzessària in sa lota po sa língua sarda primu caraterística de sa Natzioni sarda e in su diritu a s”autodecisione’ e a sa istatualidadi de sa Sardigna”.

© RIPRODUZIONE RISERVATA

0 Arrespustas a “Su Prémiu Alziator si ndi scarescit de sa língua sarda. Su Comitadu: “‘provincialismo autocolonizzante’ casteddaiu””


Is cummentus funt serraus.