> S’Assessorau de su Traballu sceberat progetus de profetu sotziali | ilMinuto

S’Assessorau de su Traballu sceberat progetus de profetu sotziali

(IlMinuto) – Casteddu, 15 de su mesi de totusantus – Assótzius de promotzioni sotziali, coperativas sotzialis, assótzius de voluntariau, organizatzionis chi no funt governativas. Funt is destinatàrius de su bandu “Serbítziu Cívicu Volonteri”, publicau de s’Assessorau de su Traballu in méritu a is interventus po s’annu 2012. Iscopu de s’avisu est afortiai a s’isvilupu de su serbítziu cívicu volonteri. Su sceberu de is progetus est indiritzau scéti a is assótzius, a is coperativas e a is organitzatzionis chi no funt governativas cun domu legali in Sardigna e chi traballant in is cumpartus de s’assistu sotziali e sótziu sanitàriu, de s’anestru e promotzioni culturali, de s’amparu e avaloramentu de s’ambienti e in àterus cumpartus de interessu sotziali, ambientali e culturali. Is progetus ant a depi durai 12 mesis e ant a depi trisinai a is personis chi no tenint traballu e chi funt residentis in Sardigna, chi apant fatu 18 annus e siant in edadi de podi traballai e chi intrint in d-una de is categorias prevìdias de s’avisu públicu: mannus, féminas, “fasce” débilis, giòvanus disimperaus cun o chentza de títulu de istúdiu e chi tengant un’edadi intre is 18 e is 32 annus, giòvanus beneficiàrius de su Pranu istraordinàriu po s’ocupatzioni de su 2011 insertaus in sa graduatória e galu chentza de essi stétius pigaus in progetus de profetu sotziali. Is candidaduras ant a depi essi imbiadas intru su 3 de su mesi de paschixedda de su 2012 atressu de una racumandada cun avisu de arricida a: assessorau de su Traballu, anestru profesionali, coperatzioni e seguresa sotziali, Serbítziu cordinamentu de is fainas territorialis de su traballu e anestru, arruga Caravaggio, sn 09121 Casteddu. Po pigai àteras scedas scriri intru su 28 de su mesi de totusantus chi benit a s’indiritzu: lav.coord.lavoro.formazione@regione.sardegna.it, inditendi in s’ogetu “Serbítziu Cívicu Volonteri”. Po ndi sciri de prus si podint cutantatai is responsàbilis de su Serbítziu cordinamentu de is fainas territorialis de su traballu e anestru: F. Caria, 0706065153 – fcaria@regione.sardegna.it; L. Caria, 0706065149 - macaria@regione.sardegna.it; D. Vadilonga, 0706065155 – dvadilonga@regione.sardegna.it; F. Pisanu, 0706065616 - fpisanu@regione.sardegna.it.

Fotografia de Wilson Severino. Pigada de Flickr

© RIPRODUZIONE RISERVATA

0 Arrespustas a “S’Assessorau de su Traballu sceberat progetus de profetu sotziali”


Is cummentus funt serraus.