> Manifestada de su 13 de su mesi totusantus: su’annotada de Onnis Presidenti de Progetu Repùblica | ilMinuto

Manifestada de su 13 de su mesi totusantus: su’annotada de Onnis Presidenti de Progetu Repùblica

(IlMinuto) – Casteddu, 15 de su mesi de totusantus – “Candu su poderi costituiu si ndi fuit in elicòteru bolit nai ca is cosas funt giai mudadas”. Est cantu afirmat Omar Onnis, Presidenti ProgReS Progetu Repùblica de Sardigna cumentendi a sa diri de protesta chi lúnis passau at amostau sa faci de una Sardigna chi bolit torrai a nasci. “No est prus tempus de trampas (e “autoinganni”), est tempus de solutzionis ‘strutturali’”, acrarat Onnis. Po su presidenti de ProgReS est difatis apretosu e netzessàriu a ponni is famílias in is cunditzionis de bivi cun dignidadi. Ma no est totu innoi: est puru doverosu bonificai is territórius po podi fai cresci a su mellus is atividadis produtivas. A s’acabada tocat puntai, segundu s’arretzeta de Progetu Repùblica, a “regenerai totus is raportus umanus, culturalis i económicus chi sa crisi longa at indebilitau o truncau”. “No ddu at a podi fai sa política italiana, e nimancu sa política sarda chi arraspundit a sa política italiana (e a is interessus italianus). – pretzisat Onnis – Forsis asumancu asuba de custu puntu is cuscéntzias cumentzant a si ndi scidai de s’aborticadura”. “No bollu prus biri sa politzia de istadu italiana pigai a cropus a is traballadoris sardus in domu insoru – sighit – No bollu prus biri paradas inútilis e agraviadoras de ministrus italianus aghillius de is políticus sardus lingi lingi, intendi fueddus búidus e de interessu fintu, acetai ca seus trataus comenti sùditus de pagu contu, chentza de pesu si no comenti ogetu de afaris, e esperimentus de ingigneria sotziali o comenti acabidadori de dógnia àliga chi calisisiat meri no bolit in mesu a is peis”. Fueddus determinaus e chentza arresselus, is de su Presidenti de ProgReS, chi aciungit chi sa solidariedadi in is cunfrontus de is traballadoris sardus no bastat prus e no serbit a nudda: “Is solutzionis chi po tempus meda si seusabetaus de is àterus ddas iaus a depi agatai e ponni in motu nos”.

Disignu de Cau Napoli. Pigada de Flickr

© RIPRODUZIONE RISERVATA

0 Arrespustas a “Manifestada de su 13 de su mesi totusantus: su’annotada de Onnis Presidenti de Progetu Repùblica”


Is cummentus funt serraus.